IMBES nga nakalingkawas ang usa ka lalaki gikan sa kalit nga pagtaas sa tubig-baha apan wala kini swerte gumikan kay nalumos gihapon kini human nga nanarap sa sapa nga bahin diha sa Villa Angela, Barangay Balulang, dakbayan sa Cagayan de Oro.
Patay ang laing biktima nga nailang si Franklin Bello, 59, lumulupyo sa nahisgutang dapit human nga nalumos matud pa sa maong sapa.
Giingong nakurat na lamang ang igsoon niini human nga nakita ang patay nga lawas sa biktima nga naglutaw-lutaw sa tunga sa maong sapa ug wala na kini kinabuhi.
Subay pa sa nakasaksi ug usa sa mga mikuha sa patay nga lawas nga naglutaw giingong nanguha og uwang sa maong sapa ang biktima bisan pa man sa kadako sa tubig niini ug grabe ka lubog.
Giingong nanidsid ang biktima og nagsige og balik-balik hangtod nga nauplok matod pa kini sa ilalom ug wala na makatunga kinsa gitoohang nalumos.
Nakurat usab kini tungod kay wala kini magdahom sa dangatan sa biktima tungod kay kabalo man matod pa kini nga molangoy ug kalit na lamang kining nalumos.
Gisaysay usab sa igsoon sa biktima kinsa nga naghilak nga posibleng nanguha usab ang maong biktima og kahoy aron nga ibaligya apan wala na kini makalingkawas tungod sa kusog nga bul-og sa tubig.
Mikabat pa sa mga usa ka oras ayha matod pa kini nakitang milutaw hinungdan nga patay na kini nga nakita.
Sa pagkakaron, ang maong patay nga lawas ang gi-atiman na sa nahabiling pamilya.