GUMIKAN nga maglisod sa pagtabok ang mga motorela drayber sa pagtabok gikan sa Cogon paingon sa Agora market latas sa Osmeña Street nga maoy nakasinati og halapad nga pagbaha niadtong Lunes, Enero 16, hinungdan nga misaka ang pletehan adlaw’ng Martes dinhi sa Cagayan de Oro.
Gikan sa P6 mitaas ang plete ngadto na sa P15-P20 gikan Cogon paingon na sa Agora terminal.
Sa pakighinabi sa SunStar SuperBalita ngadto na sa usa sa mga pasahero nga natanggong sukad sa pagsugod sa ulan kinsa pauli unta sa Claveria Misamis Oriental ang mibutyag nga wala siya’y reklamo kon pila ang pamasahe basta lang nga makaabot kini sa terminal tungod na usab kay wala kini makauli sukad pa sa pagbundak sa ulan.
“Na gahapon pa gayud ko diri, akong gipamalit sa Cogon mao’y nakatabang nako, nagpalit man ko og habol mao’y akong gigamit, nangayo na lang gani ko og kaunon didto sa tindahan kay gutom na gayud kaayo. Okay ra uy bahala pila ang plete basta lang gayud nga makaabot ko og terminal,” pahayag niini.
Samtang aduna’y ubang pasahero usab ang mireklamo ug wala misakay kay lage gitaasan kaayo sa pamasahe.
Gibutyag usab sa motorela drayber nga kini hangyo lang usab nila sa mga pasahero gumikan na usab kay dili sila makatabok paingon sa Agora gikan sa Cogon tungod na usab sa tubig nga taas pa diha sa kadalanan ilabi na sa Osmeña Street.
Nasayran nga dili pa makaagi ang mga motorela diha sa maong dalan hinungdan nga nangayo kini sila og taas nga pletehan tungod kay didto sila mo-agi sa Pimentel Street diin medyo aduna kini gilay-on.
Sa pagsulat niini nga balita ang tubig sa maong dalan anaa pa sa may tuhod ang gitas-on.