NAKABANGON gikan sa duha ka sunodsunod nga pagkapandol ang NLEX Road Warriors ug ilang gipakaging ang Alaska Aces, 113-102, sa premirong duwa kagahapon sa Philippine Basketball Association (PBA) Governor’s Cup sa Mall of Asia Arena.

Ang Road Warriors ningsaka sa 2-4 nga rekord samtang ang Aces nahagbong sa 4-2 nga baraha.

Ang makatuok nga depensa sa Road Warriors mao ang hinungdan nga wala nakapuntos ang Aces sulod sa pito ka mga minutos sa 4th quarter.

Ang imports sa Road Warriors nga sila si Kwame Alexander ug Michel Madanly lakip na ang beteranong si Asi Taulava ningtunol og dagkong mga numero aron ipabiling buhi ang ilang paglaom alang sa sunod round.

“We’re happy we got this one. At least we won against Alaska because it gives us a morale-booster as we prepare against San Miguel,” matod ni NLEX coach Boyet Fernandez sa interbyu sa InterAksyon.com.

Si Alexander, kinsa delikadong matangtang sa Road Warriors sa pag-abot sa kanhi import sa Barako Bull nga si Joshua Dollard, nagpakatap og 28 puntos aron pangulohan ang kadaugan.

Ang 2014 Sprite Slam Dunk champion nidugang sab og 11 ka rebounds ug maayo sab kini’g gipakita sa depensa.

“The way he (Alexander) played tonight, management will give him another chance. Though we’re thinking about it (replacing him), but with the way he played, mahirap naman na manalo tapos papalitan siya,” pasabot ni Fernandez.

“So he gives himself a chance to stay.  He knows how important he is to this team.”

Nakadayeg sab si Fernandez sa gipakita ni Madanly, kinsa nitampo sab og 28 puntos alang sa kadaugan.

“Every time he’s (Madanly) on the court, his teammates are energized because he comes in with the winning attitude for the team,” batbat ni Fernandez.