Editoryal: Andam ug mag-amping sa kanunay

DAGHANG mga lugar sa dakbayan sa Cagayan de Oro ang gilunopan human sa sagunsong mga pag-ulan niadtong Lunes.

Kini gumikan sa low pressure area ug ang tail end of the cold front nga nakaapekto sa amihanang bahin sa Mindanao.

Tungod sa mga pagbaha, daghang mga molupyo gipabakwit ilabi na sa duol sa suba sa dakbayan.

Daghan sab nga mga tawo natanggong samtang mga establisemento apektado sab sa baha.

Apil nga nakasinati og mga pagbaha sa maong adlaw mao ang Misamis Oriental, ilabi na sa Gingoog City human miawas ang Gahub River.

Ang nahitabo sa mga lugar, di layo nga mahitabo sab dinhi sa dakbayan sa Davao.

Sa mga milabay nga mga katuigan, nakasinati sab ang pipila ka lugar dinhi og mga pagbaha nga milampurnas og mga kabtangan ug pagkakalas sa kinabuhi.

Busa angay lang kita nga mag-amping kanunay, ilabi na gyud kon magdaut ang panahon.

Niadtong Lunes sa gabii, mibundak sab ang kusog nga ulan dinhi apan pasalamat kita nga wala kini makamugna og mga pagbaha.

Atong timan-an nga ning panahon karon, di lang mga molupyo sa daplin sa suba ang mabutang sa peligro atol sa mga pag-ulan, apan lakip na sab ang downtown area kay mobaha na man.

Daghang kadalanan lunopan sa tubig hinungdan nga daghang mga motorista ug pasahero mangatanggong intawon kay di makalabang sa baha.

Busa angay kitang andam kanunay ug seguraduhon nga magdala og panagang sa ulan, sama sa payong, raincoat ug uban pa ug kanunay nga mag-amping sa atong mga kaugalingon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph