NIAPIL na si Klay Thompson sa praktis sa Golden State Warriors kagahapon, usa ka mayorihiyang lakang aron matugtan na siya nga makaduwa sa National Basketball Association (NBA) Finals batok sa Cleveland Cavaliers.

Nagkanayon si Thompson nga maayo na ang iyang pamati ug naghuwat na lang siyang makakuha’g pagtugot gikan sa mga doktor basi sa patakaran sa NBA kabahin sa iyang sitwasyon nga nakaangkon bun-og sa ulo.

“I expect to be (cleared),” matod ni Thompson. “I’m well on my way there. I haven’t been cleared yet, but I fully expect to be in the next couple days.”

Ang NBA Finals sugdan karong Biyernes (RP time) sa Oracle Arena sa Oakland, balwarte sa Warriors.

Sa pagdagan sa mga adlaw, kon wala gihapo’y semptomas, nagkanayon ang team management nga matugtan ra si Thompson nga makaduwa sa best-of-seven finals series.

Nakaangkon bun-og ang ulo ni Thompson human kini maigo sa tuhod ni Houston Rockets forward Trevor Ariza sa Game 5 sa Wesntern Conference finals series.

Human niini, ang amahan ni Thompson nga si Mychal, mihatod kang Thompson sa ilang panimalay kay naglain ang pamati niini. Kaduha kini nakasuka.

Matod ni Thompson nga nakapasar siya sa inisyal nga concussion tests ug maayo na ang iyang pamati. Nidugang siya nga gisultihan siya sa mga doktor nga natural lang adunay mga semptomas nga mogawas kon adunay bun-og sa ulo.

“It might have been because of my adrenaline. I was so excited because we played so well,” pasabot ni Thompson. “Honestly, I felt great through the celebration and everything."

Asoy ni Thompson nga human sa maong duwa, diin mingdaog ang Warriors aron tiklupon og sayo ang Western Conference finals series, 4-1, gisultihan siya ni Ariza nga wala kini in­tensyon nga pasakitan siya.

Kapila sab gitan-aw og balik ni Thompson ang duwa pinaagi sa video tape ug nakita niyang wala gyud gituyo ni Ariza ang nahitabo.

“I was trying to get a shot fake up and then trying to go by him. It’s just unfortunate when I was trying to go by him I caught his knee,” pasabot ni Thompson.

Si Thompson wala moapil sa ensayo sa Warriors niadtong Sabado ug Dominggo aron hatagan una og saktong pahuway ang iyang kaugalingon.

Ang mga kauban ni Thompson nagkanayon nga wala ra sila’y nakitang kausaban gikan sa ilang pambatong three-pointer. (AP)