MALINAWON ang unang adlaw sa pagbukas sa klase niadtong Lunes sa pampublikong tunghaan denhi sa siyudad sa Cagayan de Oro.

Kini ang gibutyag ni Dr. Rey Manuel, assistant city school division superintendent, ug miingon nga mapasalamaton siya nga walay mga kakulian nga natigayon sa iyang paglibot suroy sa tibuok tunghaan sa siyudad.

Taliwala wala pa kini mahatag nga kinatibuk-an nga gidaghanon sa mga enrollees ug mga transferees sa tibuok tunghaan apan gibutyag niini nga daghan sa mga tunghaan, labina didto sa mga hinter barangay, ang misaka ang ihap sa mga nagtungha.

Dugang niini nga sa pagsugod sa programang K to 12, adunay pipila ka mga tinun-an nga nagtransfer gikan sa pribadong mga tunghaan.

Gibutyag usab ni Manuel nga aduna pay pipila ka mga miapas sa pagpaenrol niadtong unang adlaw sa klase apan giingong uno porsiyento lamang kini sa kinatibuk-an nga enrollees ug normal lamang kini labina diha sa unang adlaw sa pagtungha.

Mapasalamaton usab si Manuel sa gihatag nga seguridad sa kapolisan gikan sa Cagayan de Oro City Police Office.

Gihangyo lamang ni Manuel ang mga ginikanan nga kung mahimo, dili na magsige og uban sa ilang mga anak labina niadtong Kinder ug Grade One diha sulod sa tunghaan aron makakat-on ang ilang mga anak nga mahimong independent.