PIPILA ka mga tinun-an sa elementarya ang gihasolan pag-ayo sa double shifting nga klase atol sa pagbukas sa klase sa pampublikong tunghaan ning siyudad sa Cagayan de Oro.
Si Kate, usa ka tinun-an sa Grade 5 sa City Central School nga nahinabi sa Sun.Star SuperBalita, niingon nga double shifting ang ilang tunghaan diin magsugod ang klase sa alas 6:00 sa buntag paingon sa alas 12:00 sa udto.
Sa pagawas sa mga tinun-an sa alas 12:00 sa udto, adunay mohulip nga ikaduhang batch sa mga tinun-an nga magsugod sa maong oras ug matapos usab sa alas 6:00 sa gabii.
Matud ni Kate nga hasol alang kaniya ang maong shifting tungod kay alas 4:00 pa sa kadlawon siya momata matag adlaw aron dili ma-late sa klase.
“Dugay naman ni nga ingon ani. Hasol siya para nako kay usahay tugnaw kaayo dili nalang ko maligo, magbalon ko og pamahaw kay sayo paman gud kaayo ikaon,” matud ni Kate.
Gibutyag ni Celso L. Pagulon, principal sa City Central School, nga adunay double shifting tungod kay aduna gyod pagkulang sa classroom.
Kahinumduman nga nasunog niadtong niaging katuigan ang maong tunghaan diin halos naugdaw ang tibuok tunghaan ug sugod niadto adunay nangatukod nga classroom apan dili gihapon paigo.
Sa kasamtangan, adunay mokabat 8,000 ka mga enrollees nga gilaumang mosaka ngadto sa 9,000 tungod kay aduna pay uwahing nagpa-enrol.
Gihangyo lamang ni Pagulon ang pagsabot sa mga tinun-an kalabot sa double shifting.