SUSIHON sa kapuli­san ang taho nga usa ka sindikato maoy nagpaluyo sa mga bata nga nagpakilimos sa kadalanan sa siyudad.

Ang Cebu City Police Office gihangyo sa Police Consultative and Advisory Council (PCAC) nga kini susihon atoll sa tigom kagahapon.

Usa ka tawo ang gitumbok nga maoy moladlad sa mga bata ug mao ang mokuha kanila human gipakatap sa mga aseras sa siyudad.

Si Isabelita Ganub sa Cebu City Anti Mendicancy Office nitaho nga nakadawat sila og impormasyon nga adunay tawo nga magdala og mga bata aron magpakilimos sa kadalanan.

Ang mga bata kuhaon panahon sa ka­gabhion.

Human nila mada­wat ang taho, ila kining gisusi, apan wa na nila maabti pa ang maong tawo.

Ang taho nadawat usab sa Children’s Legal Bureau, usa ka non go­vernmental organization nga nanalipod sa katungod sa kabata-an, ilabi na sa mga bata nga anaa sa kadalanan.

“We have heard that report, pero sama ra og hearsay lang. Walay mi-execute og affidavit or mi-file og complaint sa office,”  Matod ni Manlalaban Joan Saniel, executive director sa CLB.

Tungod niini, usa ka resolusyon gipasar sa PCAC pinaagi sa pagpangulo ni Bise Mayor Edgar Labella nga nag-awhag sa CCPO aron sa pagsusi sa maong aligasyon nga adunay sindikato nga nagpaluyo sa mga bata nga nagpakilimos sa kadalanan.

Matod ni Sr. Supt. Mariano Batiancela, acting city police director, nga mopadala siya og mga tawo sa dapit diin gikataho nga nag-estambay ang maong tawo.

Ila usab nga papanid-an ang uban pang parte sa siyudad aron matino kini. 

Nahisgutan kini tungod sa kaso ni Chastity Mirabiles, ang 11 anyos nga makililimos nga na­matay human gituohang gikulata.

Mga pulis sa Fuente ang gipasanginlan, apan nagpadayon pa ang imbestigasyon alang niini.JFT

Nabutyag  usab ang maong pagduda human gihisgutan sa PCAC ang nahitabo ni Chastity Merabeles, usa ka batang minor de edad gikataho nga namatay tungod sa bun-og human masikop sa kapolisan sa Fuente.

Ang kapolisan mikunpirmar nga ang maong bata gituyo sa pagpakilimos sa iyang inahan sa kadalanan tungod sa bisyo sa drogas.

Ang inahan nga si “Naomi” makadaghan na ma-rescue sa mga sakop sa Anti Mendicancy Office nga mo-uban sa iyang anak sa pagpakilimos, gikataho nga sabog sa illegal nga drogas.