“PILA nay patay sa inyong batch?” nangutana ang babaye sa iyang kauban sa lamesa. “Upat na,” mitu­bag ang iyang kauban. “Inyong batch, pila nay patay?”

Nangaon mi ato sa a­­kong kaubang maestro sa karenderya duol sa among eskuylahan sa may Gorordo Ave. Kay gamay ra man ang lugar, nagsikit-sikit ang mga lamesa, kuwang na lang magsikhanay mi sa a­­mong tapad.

Duha silang mga babaye sa pikas lamesa. Mga ba­tan-on pa, wa pa tingali to silay traynta. Ug bisag un­saon nilag hinay sa ilang tingog, madunggan gihapon namo kay sikit lagi kaayo among lamesa.

“Didto sa basketan gipatay tong usa namo,” ingon tong usa. “Gikan siyag duty, giulo pagpusil, patay dayon.”

“Nag-uniform pa?” nangutana ang ikaduha. “Wa pa kailis, gikan pa gyog duty, ninghapit sa basketan kay liga man,” mitubag tong usa. “Ang uban nagsakay’g motor, giatangan, ang uban disgrasya lang gyod.”

“Maayo gani nang inyo upat pa, amo unom na,” mitubag tong ikaduha.

Kakuyaw ba aning mga bayhana, miingon ko sa kaugalingon. Kabata pa ani nila pero kadaghan na bang namatay sa ilang batch. Na-imagine nako tong nahagba sa basketan, naligo sa kaugalingon dugo. Piskot dinugoan pa gyod akong sud-an.

Kaistoryahon kaayo ko sa akong kaubang maes­tro kay kakataw-onon kong naminaw sa duha. Apan maikog ko kay segurado mang madunggan mi. Abi pa lang among giyagayagaan ang ilang nangamatay nga classmate.

Maguwang kaayo ko aning mga bayhana, apan pila na bay namatay sa among batch? Usa, duha? Daghan na kaayo nang tulo. Kanang magtapok mi usahay, di gani mi hapit maghisgot kon naa na bay nag-maintenance namo para arthritis.

Apan diay mga bata ka kaayo, nag-ihap na sa mga nangamatay sa ilang batch.

“Giinitan lang gyod tong usa namo, hubog ang nagtira,” ingon tong ikaduhang babaye. “Mao nay lisod, kanang initan lang ba,” mitubag iyang kauban. Nahilom dayon sila, gitiwas ang ilang gikaon, namarog ug nanglakaw.

“Ahaka, unsa to bay?” nagkatawa kong miistorya sa akong kauban. “Kuyawag topic mga bayhana oy.” Mikatawa pud og apil akong kauban.

“Mga polis to sila sir,” misagbat ang nagkaon sa among luyo. “Wa lang mo kaila kay wa nag-uniform.”

Milingi ko sa luyo. Nagsugod nag pangabot ang mga polis aron maniudto, gikan sa Camp Sotero Cabahug, ang headquarters sa Cebu City Police Office nga nalimot ko tapad ra man diay sa among eskuylahan. Gibayran namo among gikaon ug migawas nga way tingog-tingog. (@Insoymada)