AGI’G pagdisiplina sa mga bata ug mga ginikanan, hugot nga gimando sa Department of Education (DepEd) 7 sa tanang pampublikong mga tunghaan nga di na dawaton kadtong mga magpa-enroll sunod semana.

Karong semanaha, modawat pa sila og late enrollees apan kinahanglang balido ang rason sa ilang kalangay.

Kutob na lang karong Biyernes ang pagdawat sa mga public elementary og high school sa mga late enrollee.

Human niini, kinahanglang maduso na sa tanang mga tunghaan ang lista sa mga nagpa-enroll ngadto sa rehiyonal nga buhatan sa DepEd.

Matod ni DepEd 7 regional director, Juliet Jeruta, kinahanglang balido ang katarungan sa mga bata ug mga ginikanan nganong nalangay sila pagpa-enroll.

Lakip sa mga rason nga mahimong dawaton ang mga late enrollees mao lamang ang kamatayon sa sakop sa pamilya, pagkasakit sa bata nga maoy ipa-enroll o di ba transferee ang bata ug nalangay pagkuha sa iyang mga credential gikan sa karaang tunghaan.

Gilantawan sa DepEd7 nga mosaka og 3 pors­yento ang gidaghanon mga nagpa-enroll sa school year 2015-2016 tungod sa pagsulod sa daghang mga tinun-an sa kindergarten, grade 1 ug grade 7 ingon man 1st year high school.

Kon makuha na sa regional office ang listahan sa enrollment, mao kini ang himuong basehanan pag­hatag og budget ngadto sa matag tunghaan, ubos sa hurisdiksiyon niini.

Gipasabot ni Jeruta nga ang budget alang sa maintenance and other operating expenses sa matag pampublikong tunghaan, mag-depende sa ihap sa mga tinun-an nga na-enroll.