TULO ka dump truck nga gipanag-iya sa service provider nga gikuha sa Dakbayan sa Sugbo aron paghakot sa basura gisikop sa Dakbayan sa Carcar kagahapon human wa niini mapatuman ang lakang nga di kini magbilin og baho sa panahon nga moagi sa maong dapit.

Nasayran nga ang duga o ang likido gikan sa basura sa maong mga truck nga magtulo sa dalan maoy usa sa reklamo sa mga residente sa dakbayan sa Carcar ug ubang lungsod ug syudad sa unang distrito sa Sugbo.

Ang trucks nga gipanag-iya sa Jomara Konstruct Corp anaa maglabayan sa sanitary landfill sa lungsod sa Aloguinsan hinungdan nga moagi kini sa kadalanan sa unang distrito.

Human sa mga reklamo, nakadesider na ang Environmental Management Bureau (EMB) 7 nga mohimo usab og pakisusi sa maong service provider.

Gisuwayan pagkuha sa SunStar Cebu ang habig sa JKC apan matod sa sekretarya sa maong firm, nagmeeting pa ang mga opisyal niini sa pagkutlo ning balita.

Matod ni Aida Alcontin, pangu sa Carcar City Environment and Natural Resources Office (CCENRO) nga tulo ka truck ang ilang nasikop na sa duha ka mga operasyon sa Barangay Poblacion 3 ug Perrelos.

Ang maong mga truck nga puno sa basura, paingon unta sa landfill sa Aloguinsan dihang gidakop kini sa CCENRO personnel.

Gikataho nga nagbilin og duga sa kadalanan ang maong mga truck diin gitataw nga baho kaayo.

Gawas nga gisakmit ang truck, tanggong pud ang mga drivers niini.

Apan matod ni Alcontin nga gibuhian ra usab ang mga driver human nipasalig ang kadagkuan sa JKC ngadto kang Mayor Nicepuro Apura nga ipatuman na nila ang lakang nga di magbilin og duga sa basura nga mao’y rason sa baho.

Kon magpadayon ang maong problema matod ni Alcontin, mopasaka sila og kasong kalapasan sa Comprehensive Environmental and Sanitation Code, Republic Act 9003 ug sa Clean Air Act batok sa JKC

Ang legal division chief sa EMB 7 nga si Atty. Unalee Monares nibutyag usab nga susihon nila og aduna’y kasamtangan sila nga palisiya og unsaon nila pagdala sa kaso sa JKC.

Dugang ni Monares nga nakamulta na ang tag-iya sa landfill sa Aloguinsan human nasayran nga nag-operate kini nga wala’y environmental compliance certificate (ECC).

Nakabayad ra hinuon ang tag-iya sa multa apan matod ni Monares nga mamahimo nga ang local government units ang mopasaka og kaso batok sa JKC sa kalapasan sa RA 9003.