GIPILDE sa mas eksperyensadong MYT I-Fix-It team ang batan-ong Southern de Oro Philippines College (SPC) Sharks, 116-103, aron angkonon ang kampyonato sa Gitagum Invitational Basketball Tournament Mayor Emmanuel Mugot Cup niadtong Domingo sa Gitagum gym.
Nisalir ang eksperyensya sa MYT ni coach Jaymar Seriña-Rivera aron pugngan ang kulba nga hulga sa Sharks ni coach Rey Dangcal sa kataposang kwarter.
Abi sa MYT nga komportable na sila paingon sa kadaogan human makabinat sila og sobra sa 20 puntos nga labaw.
Apan, nipakita og kulbahinam nga away ang two-time CDOBF collegiate champions ni Dangcal human maputol nila ang dako nga biya ug milangkat og duha ka puntos nga labaw sa ika-upat nga kwarter.
"Didto mi namuhunan sa full-court trapping defense ug nakakuha mi og dakong hulga kanila," ingon ni Dangcal.
Naa sab si LJ Aquino nga namomba sa gawas ingon man ni Jet Egan.
Dili bago ang MYT sa ingon ana nga sitwasyon ug dali ra naka-adyas human midistansya sila pagbinat og labaw paingon sa kadaogan.
Gilangkoban ang MYT nila Van-Van Tagupa, Rocky Clavel, Paul Siarot, John Manatad, Jun Pardillo, Ramil Cezar, ug Felix Laniton.
Konswelo sa Sharks, giparot nila ang MYT sa elimination round apan napilde sa mas bug-at nga kaatbang nga ang Sultan Naga Dimaporo ni coach Jaime "Diding" Rivera.
Gikomposar ang SND nila Nat Cruz, Jeff Morial, Welland Muñoz, Jun Daanoy, Frank Nailon ug sa University of Visayas Green Lancers import center Bassieru Sackor.
Ang MYT ra sab ang nakapilde sa SND sa iskor 87-70 diin nag-abot sila uban ang SPC sa triple tie nga parehas adunay 2-1 win-loss card.
Hapit pa nga maharus sa SPC nga walay tatsa kung wala makaeskapo ang SND sa ilang panag-atbang.
Ang buzzer beater shot ni Lyndon Godez maoy nakapasakwat sa SND sa daug batok sa Sharks.
Gamit ang quotient tie-break human sa triple tie, nilutaw nga ang MYT ug SPC ang mag-abot sa finals.
Giuli sa MYT ang P70,000 first prize, samtang niuli ang SPC ug SND og P50,000 ug P30,000 cash prize, sunod-sunod.