GIKUMPIRMA sa Provincial Disaster Risk Reduction Management Department (PDRRMD) sa Misamis Oriental nga moabot sa upat ka tawo ang natalang patay sa nasinating low pressure and tail end of cold front niadtong adlawng Lunes sa kinatibuk-an sa Misamis Oriental.
Gibutyag ni Fernando Vincent Dy, officer-in-charge sa PDRRMD nga naggikan ang mga kaswalidad sa lungsod sa Magsaysay, lungsod sa Opol, ug dakbayan sa Gingoog.
Duha sa mga biktima ang pulos minor de edad nga nag-edad ug 10 anyos ug 14 anyos.
Sa kinatibuk-an, adunay mokabat 1,687 ka pamilya ang apektado sa tibuok distrito diin gilangkuban kini sa 16 ka lungsod ug usa ka dakbayan, Gingoog.
Niadtong adlaw'ng Martes, ang duha ka lungsod, Lugait ug Lagonglong, mideklarar og state of calamity.
Sa pagkakaron, padayon gihapon ang pag-evaluate sa PDRRMD sa kahimtang sa mga nabahaan lakip ang pag-assess sa ilang mga balay nga apektado.
Hinuon ang tanan nga mga namakwit atol sa pagbaha ang miuli na sa ilang tagsa-tagsa ka mga puloy-anan.