DAVAO DEL SUR -- Gilibot sa pipila ka mga opisyal sa Regional Internal Affairs Service (RIAS) gikan sa Dakbayan sa Davao ang mga istasyonan sa kapulisan sa probinsiya.

Sa maong paglibot, gihimo dayon ang 2nd Quarter Pro-active Inspection ug pag-audit sa mga personahe sa kapulisan sa probinsiya.

Ang paglibot sa mga istasyonan gipangunahan ni Police Superintendent Lorenzo Gernato Sr., lakip na ang Davao del Sur Provincial Police Office (DSPPO).

Sa lungsod sa Bansalan, gihimo sab sa mga opisyal ang "readiness and evaluation test" diin gipakita sa kapulisan ang ilang kahanas sa pag-responde sa mga krimen.

Si Chief Inspector Jeffrey Latayada, hepe sa Bansalan Police Station, mibutyag nga aduna'y operational readiness drills ang ilang gihimo.

Suma niya, mahinungdanon ang maong inspeksyon aron mas molambo pa ang serbisyo sa kapulisan ngadto sa pagtubag sa kinahanglanon sa publiko.

Gihimo sab ang pag-ihap sa mga personahe sa kapulisan aron masuta kon di ba kuwang.

Apil nga gipakita sa kapulisan ang ilang mga pamaagi sa pag-aksiyon batok sa mga nag-unang kriminalidad. (OBD)