MIPAGAWAS og arrest warrant ang Regional Trial Court (RTC) Branch 54 sa Davao, ubos ni Judge Melinda Alconcel-Dayanghirang, batok sa mga suspek sa pagpamomba sa Roxas night market tungod sa ilang kasong giatubang niadtong Enero 9, 2017.
Lakip sa arrest warrant mao ang katorse ka mga gitaral nga mga tawo nga sila si Abubakar Zulkifli, TJ Tagadaya Macabalang, Wendel Facturan, Musali Mustapha, Datu Masla Sema, Abu Hadid Dilangalen, Jessy Vincent Original, Zack Haron Lopez, Pendatum Coy Mahurom, usa ka alyas Cocoy, Abu Calid, Abu Solaiman, Jackson Usi, ug Ausa Mamasapano.
Tulo sa mga dinakpan gidetinar sa Manila samtang ang laing tulo gidetiner sa dakbayan sa Davao.
Si Macabalang, giingong "triggerman" kinsa nanawag sa telepono nga nagpabuto sa improvised explosive device, Facturan, giingong maoy nagdala sa bomba kinsa naglingkod sa bangko, ug ang usa kinsa nagpahimutang sa backpack nga dunay sulod nga IED sa lugar ug si Mustapha, kinsa nag-video sa insidente gipresentar sayo niini ni Defense Secretary Delfin Lorenzana niadtong Oktubre 8, 2016 ug nadetinar pa sa Manila.
Samtang sila si Zach Haron Villanueva Lopez, Jackson Mangulamas Usi, ug Ausan Abdullah Mamasapano bag-ohay lang gibalhin ngadto sa Maa City Jail.
Ang personahe sa RTC 54 sa paghinabi sa SunStar Davao Miyerkules nagbutyag nga si Judge Dayanghirang magtakda lang sa pagtaral sa pagdungog sa karong "terrorism" nga gipasaka batok sa mga suspek kon tanan kanila maaresto na.
Sila si Zulkifli, Sema, Dilangalen, Original, Mahurom, alas Cocoy, Calid, Solaiman padayon pang gipangita.
Base sa mga taho, si Presidente Rodrigo Duterte niadtong Sabado nagkompirma nga si Sema o Datu Mohammad Abduljabbar Sema, 26, nadakpan niadtong November 24, 2016 didto sa Kuala Lumpur International Airport sa dihang miabot gikan sa Bangkok sakay sa Air Asia flight AK 891.
Si Sema, kapitan sa Barangay Rosary Heights 7 sa Cotabato City, mao ang anak ni Muslimin Sema, tsirman sa pinakadakong faction sa MNLF ug si Maguindanao Representative Bai Sandra Sema.
Si Muslimin Sema mao kanhi mayor sa siyudad sa Cotabato ug gikonsidera alang sa pagpasakop sa Bangsamoro Transition Council.
Ang abogado ni Sema nga si Jose Aguila Grapilon bag-ohay lang mipasaka og motion for determination of probable cause sa pagtaral sa iyang kliyente sa kasong murder ug frustrated murder nga gisang-at batok Sema ngadto kang presiding Judge Lope Callo sa RTC Branch 33 may kabahin sa pagpamomba sa Roxas night market.
Samtang si Judge Callo nagmando sa pagpagawas sa subpoena alang sa duha ka mga suspek, Jackson Usi, ug Ausa Mamasapano kinsa miisyu og extrajudicial confession nga nagtudlo kang Sema nga apil sa kaso.
Base sa extrajudicial confession sa duha, si Sema giingong misuhestiyon nga ang bomba gamiton sa dakbayan sa Davao.
Si Callo mimando nga ang subpoena ipagawas ngadto sa Criminal Investigation and Detection Group aron nga mopatim-aw si Usi ug Mamasapano sa sunod nga pagdungog gitakda sa Pebrero 3, 2017. (Karina V. Cañedo)