KORONADAL CITY -- Apektado ang mga fish cage operator sa nahitabong fish kill sa Lake Sebu, South Cotabato.
Nahibaloan nga nasayang ang sobra napulo ka libo ka kilo nga isdang Tilapia gumikan sa fish kill resulta sa kakulang sa supply sa oxygen sa pag-usab-usab sa temperatura sa tubig sa Lake Sebu.
Matud ni Lake Sebu Deputy Fish Warden Rudy Muyco aron maluwas sa fish kill ang mga isda nga Tilapia kinahanglan nga sayo sila nga anihon.
Mga Tilapia nga giani sa mga fish cage operators, ila na lamang nga gipanghatag ngadto sa katawhan sa Lake Sebu.
Kahinumdoman nga niadtong bulan sa Oktubre ug Disyembre 2016, mga tonelada nga isda nga Tilapia ang nasayang tungod sa fish kill.
Gibana-bana nga moabot na sa P6 milyones ang nalugi sa mga fish cage operators tungod sa fish kill.
Gitakda nga manghatag og Tilapia fingerlings ang lokal nga gobyerno ngadto sa mga naapektuhan nga fish cage operators sa pagpanguna ni Governor Daisy Avance Fuentes. (Edgar E. Fuerzas)