ANG mga pulis nga nagbantay sa Association of Southeast Asian Nations (Asean) Summit mao sab ang gipakatag karon aron bantayan ang mga lugar nga adtoan sa 20 ka mga kandidata sa Miss Universe 2017 karong adlawa sa Davao City.
"Well-prepared yung kapulisan natin and in fact, sila 'yung nagbabantay during Asean summit," sulti ni Davao City Police Office director Senior Superintendent Michael John Dubria.
Dugang sa opisyal nga gipahimutang na ang mga pulis sa ilang mga nagkadaiyang area of responsibility aron maoy magbantay sa mga venue diin magpahigayon sa fashion show ug city tour ang mga kandidata.
"Ang atong SM Lanang, full force ang atong kapulisan, naa diha sa palibot ug naa ta'y mga scanners sa mga sakyanan nga mosulod sa vicinity sa SM," dugang ni Dubria.
Karong buntag gilauman nga dunay pagahimuon nga city tour ang mga kandidata ug pagka hapon gilauman nga mosalmot sila sa Mindanao Tapestry Fashion Show sa SMX Convention Center sa SM Lanang Premier.
Ang kapulisan sa rehiyon anaa gihapon sa alert level 3 uban sa 4,400 ka mga augmentation personnel gikan sa nagkadaiyang unit sa kapulisan nga maoy mobantay sa mga kandidata.
Ang K-9 Units, Task Force Davao ug ubang unit sa kasundalohan ug Davao City Public Safety and Command Center maoy frontline security units sa mga dapit diin gipahimutang ang tipik sa programa sa Miss Universe 2017. (Jeepy P. Compio)