GENERAL SANTOS CITY -- Mi-apela karon og pag ampo ang inahan sa bitayunon nga overseas Filipino worker (OFW) didto sa United Arab Emirates sa iyahang mga kababayan.

Matod pa ni Rajima Dalquez nga hilabihang kaguol ang ilang pamilya karong panahona samtang nagkaduol ang adlaw nga gitakdang bitayon ang ilang anak nga si Jennifer Dalquez.

Sumala pa nga gisentensiyahan og bitay si Jennifer human niini mapatay ang iyang agalon sa dihang gisulayan siya og lugos.

Gitug-an ni Rajima nga wala pa'y tubag karon ang hari sa United Arab Emirates (UAE) sa apela sa gobyerno sa Pilipinas nga mahatagan si Jennifer og executive clemency o masalbar sa silot kamatayon.

Personal nga nahimamat nila ang anak sulod sa prisohan sa UAE sa tabang sa gobyerno pinaagi sa Department of Foreign Affairs Gensan.

"Mora'g ginakumot ang akong kasingkasing ug makaistorya namo ang among anak nga nagapakiluoy sa amoa, nga matabangan siya. Unsaon man na namo, Sir. Gihimo na namo ang tanan. Di gyud mi makadawat sa madangatan sa among anak, Sir, ba, unta masalbar siya sa pagbitay," pahayag ni Rajima.

Sa pagkakaron, padayon ang panawagan sa pamilyang Dalquez ngadto sa mga opisyal sa gobyerno nga matabangan sila ug mahatagan og abogado nga maoy manalipod sa kaso ni Jennifer sa pagtuo nga self defense lamang ang gihimo niini sa pagpatay sa iyang amo human siya gisulayan og lugos.

Gihukman si Dalquez sa silot kamatayon niadtong Mayo 20. (ECB)