ANG Department of Social Welfare and De­velopment (DSWD) mi­gahin og P6 milyones para sa programa ug pro­yekto sa mga batang libudsuroy sa dakbayan sa Sugbo ug mga batang Badjao sa Dauis sa lalawigan sa Bohol.

Kini ang gibutyag ni Dr. Ester Concha, pangu­lo sa Department of Social Welfare and Services (DSWS) sa Cebu City Go­vernment kansang kantidad bahinon sa kaduha.

Gitug-an niini nga ang P3 milyones para sa mga bata sa Cebu City Street Children ug ang laing P3 milyones gitagana sa mga batang Badjao nga nagpuyo sa barangay Mambaling ug sa Dauis.

Gipahibawo ni Concha nga makigtagbo pa sila ni Bise Mayor Edgardo Labella uban sa City Anti Mendicancy ug mga opisyal sa Cebu City Police Office aron hisgutan ang programa ug proyekto nga ilang ipatuman para sa mga benepisyaryo sa maong pundo.

Ang pangulo sa DSWS nagkanayon nga posib­le karong buwana, mahatag na ang pundo gi­kan sa head office paingon sa regional nga buhatan aron magamit ang maong pundo.