WA kauyon ang Philip­pine Association of Detective and Protective Agency Operators (PADPAO) 7 chapter sa gitanyag sa PNP Firearms and Explosive Office kabahin niining pagkuha na unya sa tanang security guards din­hi sa nasod og tagsa-tagsa niini ka License To Own and Possess (LTOP).

Gihulagway sa maong organisasyon nga di na dapat kun kinahanglan nga mokuha pa og LTOP ang mga security guard tungod kay aduna na sila’y LTOP isip sila mao ang ahensiya sa maong mga guwardiya ingon man sila usab ang nanag-iya sa mga armas nga gihuptan sa mga guwardiya.

“Dili ug dili mi mosugot nga ang mga guwardiya pakuhaon og LTOP,” matod sa presidente sa PADPAO 7 chapter nga si Engr. Ramocito “Don-don” Arquiza.

Dinhi sa Central Visayas aduna’y kapin sa 30,000 ka mga guwardiya ang moabag sa kapin libo nga gastohan sa LTOP pananglitan nga matuman na gyud ang maong bag-ong gitangyag nga rules ang regulation sa PNP FEO. Ang PADPAO 7 adunay kapin sa 200 ka miyembro nga mga security agency lakip na ang Cebu ug non-Cebu based nga mga ahensiya.

“License to own and possess, in other words, you must possess the firearm that you own and you cannot also possess the firearm that you do not own,” matod sa bise-presidente sa PADPAO 7 nga si Atty. Edgar Gica.

Nitataw pa si Gica kon nganong palisod-lisuran paman gyud sila sa ilang negosyo nga nahimong ahente raman sila sa mga guwardiya nila ug sa mga kliyente.

Giingon nga dili kini maki-angayon ngadto sa mga guwardiya hilabi na nga minimum wage lang ang gidawat niini. Aron ipadayag ang ilang pagsupak sa maong tanyag aduna’y usa ka forum ang ipahiga­yon karong umaabot Hunyo 9, diha sa City Sports Club, Cebu Business Park sa ala 1:00 sa hapon.

Lakip nga ilang giimbitar sa maong forum and hepe sa Civil Security Group sa PNP nga si Chief Supt. Elmer Soria ug Chief Supt. Noel Cons­tantino, hepe sa PNP Supervisory Office for Security and In­vestigation Agencies. LTOP.