GIANDAM na sa Department of Social Welfare and Services (DSWS), Children’s Legal Bureau (CLB) ang mga ebedinsya aron sa pagpasaka og kaso batok sa inahan sa 11 anyos nga menor-de-edad kinsa namatay human giingong gidagmalan sa mga pulis.
Kini ang gibutyag ni Dr. Ester Concha, pangulo sa DSWS, human sa meeting sa Police Coordinating and Advisory Council (PCAC) uban nilang Atty. Joan Saniel sa Children’s Legal Bureau gumikan sa pagpabaya ni Naomi Mirabiles ug sa iyang kaipon.
Si Bise Mayor Edgardo Labella, presiding officer sa PCAC, nagkanayon nga subay sa Republic Act No. 7610 kon mas naila nga “An act providing for stronger deterrence and special protection against child abuse, exploitation and discrimination, providing penalties for its violation and for other purposes” adunay nahimong kalapasan ang ginikanan.
Dili usab makalikay ang ubang ginikanan kansang mga anak gipasagdan nga magpalimos sa mga dalan sanglit apilon nila kini og pagpasaka og kaso.
Si Concha nagkanayon nga ang pamilyang Mirabiles gihatagan og traysikad sa usa ka non-government organization para sa panginabuhian apan gigamit hinuon ang maong traysikad paghatod ni Naomi ug Chastity ngadto sa Mango Avenue aron magpakilimos.
Ang Cebu City Police Office pinangulohan ni PSSupt. Mariano Batiancela nihimo na usab og surveillance sa giingong tawo nga maoy handler sa mga batang makililimos sa downtown area aron ibalhog sa bilanggoan.
Modus sa maong handler mao ang pagpakatap sa mga bata aron mangayo og limos ug inig abot sa oras kuhaon ra usab sila pauli sa ilang gipuy-an.
Samtang gihuwat pa sa National Bureau of Investigation ang counter affidavit ni PCI Wildemar Tiu sa Police Station 2 kinsa apil sa gipasanginlan sa kamatayon sa menor-de-edad ug paghimo og fact finding investigation nga maoy himuong sukdanan kon pasakaan ba og kasong kriminal, administratiba.