MAGPADAYON ang na­sinati nga rotation brownout ubos sa franchise area sa Visayan Electric Company sa mosunod nga mga adlaw hangtod mabalik sa normal ang supply sa kur­yente sa Visayas grid.

Si Sebastian Lacson, chief operating officer sa Veco, nagkanayon nga kon mabalik na sa koneksyon sa grid ang usa ka unit sa Cebu Energy Development Corp., nga adunay kapasidad nga 80 megawatts o bisan ang 100 mw unit sa Korean Power Corp.-SPC karong Huwebes mabalik na sa normal ang supply ug wa­la nay rotation brownout.

Matod niya ang Cebu-Negros-Panay grid nagkuwang og 280 mw nga kuryente.

Ang 200 megawatts nga kakuwangon ang gikan sa Kepco-SPC human naigo sa sunog ang cru­sher building niini niadtong Sabado sa buntag, samtang ang 80 mw gikan sa CEDC nga nadaot.

Gumikan sa kakuwang og supply sa Visayas grid, ang Veco nagkuwang og 40-50 mw nga kuryente hinungdan nga ningpatuman kini og usa ka oras nga rotation brownout sa mga lugar ubos sa franchise area niini.

Ang Luzon grid nihatag og kuryente apan dili gihapon kini paigo, sumala ni Lacson.

Hinuon naminosan ang oras sa brownout gumikan sa gipatuman sa Veco nga Interruptible Load Program uban sa mga kompaniya nga boluntaryo ninggamit sa ilang kaugalingon nga generator sets ug naibanan og 15-17 mw ang 40 mw nga kakuwang sa kuryente.

Tungod sa ILP, tag usa ka oras na lang ang gi­patuman nga rotation brownout sa Veco.

“Because of that (ILP) we’re able the pain so to speak of the rotation brownout, a little more manageable and a little more acceptable to everyone... ILP becomes a savior,” nagkanayon si Lacson sa gipatawag nga press conference kagahapon.

Miapil sa ILP ang Apo Cement, SM, Metro Ayala, Chong Hua Hospital, Lucky Tableware, ug Marco Polo.

Siya niklaro ang Veco wa magkuhaan og kur­yente sa Kepco-SPC apan tungod kay nakasumpay kini sa Visayas grid, naapektuhan og apil ang ilang mga konsumedor sa sunog sa maong planta sa dakbayan sa Naga.