DUHA ka mga tawo, usa niini 4 anyos nga lalake, nangamatay dihang usa ka dumptruck nidaro sa usa ka balay nga dunay sari-sari store sa sityo Apid Acro, Barangay Cantabaco, dakbayan sa Toledo kagahapon sa alas 12:45 sa udto.
Si PO3 Julius Sanchez sa Toledo City Police Station niila sa nangamatay nga sila si James Kyle Selgas ug Meazy Chila Alisoso, 19.
Nangaangol giilang mao sila si Raymunda Largo, 70, biyuda; Joven Largo, 43, minyo; 3 anyos nga si Jake Alisoso; ug ang dos anyos nga anak ni si Meazy Chila nga si Alisha Keith.
Tanang mga biktima managparyente.
Si Sanchez niingon nga nahitabo ang aksidente dihang ang brakes sa Fuzo dump truck (JEW 108) nga gimaneho ni Johnrey Sarita, 29, nipalyar.
Si Sarita nagdulhog sa kurbadahong karsada sa dapit nga kuyaw sa aksidente.
Ang trak nga dunay karga nga bas ug graba gikan sa lungsod sa Balamban ug padung sa dakbayan sa Talisay.
Ang tanang nangaangol gipangdala sa South General Hospital sa City of Naga.
Si Alisha Keith gipapauli gilayon.
Si Sarita, kinsa nabalian sa iyang wala nga paa human molayat gikan sa trak, gidala sa Carmen Copper Hospital sa Toledo City.
Si Alisha Keith gipakatug sud sa duyan samtang si Meazy Chila nanghugas sa mga gamit sa kusina dihang nahitabo ang aksidente.
Nangaputol ang kalawasan ni Meazy Chila kay napiit siya sa trak.
Sa pagsuwat ning taho, nagpadayon pa ang pagkuha sa ubang mga parte sa iyang lawas.
Ang apohan ni Alisha Keith nga si Julieta Toledo, nisulti sa Sun.Star nga katapusan niyang nakit-an ang iyang apo ug anak nga babaye niadtong Lunes dihang niduaw sa Toledo City aron pagtambong sa fiesta.
Siya nisulti sa mga reporter nga ang iyang apo nga babaye di pa unta gustong mopauli kay ganahan pa siya nga motan aw sa fiesta.
Apan ang iyang amahan nga si Niño gusto nang mopauli.
“Nganong niuli paman sila uy? Wala nalang unta sila nipauli, buhi pa unta sila,” matod ni Julieta, nga naghilak. (Sun.Star Cebu/dugang taho ni GPL)