SUGDAN na sa kagamhanan sa dakbayan sa Sugbo sunod semana ang clearing operation sa Barangay Duljo Fatima aron himuon kining dalan.

Subay niini, adunay 71 ka panimalay ang maapektohan diin gibista pagbalik sa Division for the Welfare of the Urban Poor (DWUP) ang mga residente niadtong Miyerkules aron pagpahibawo pagbalik kabahin sa maong plano.

Giawhag na usab sila karon sa DWUP nga mangita na og kabalhinan diin hatagan sila og subsidy rental sa syudad aron magamit nila pangbayad sa temporaryo nga abangan niini.

Sa kinatibuk-an 71 ka balay ang apektado sa clearing operation apan gipaabot nga naa pa lang sa 20 ang panimalay nga mipasalig nga moguba sa ilang mga panimalay karong Sabado ug Dominggo human giawhag sila sa DWUP nga mangita na og kabalhinan.

Matod sa pangu sa DWUP Gene­vieve Alcoseba nga angayang masugdan na ang plano sa siyudad sa Barangay Duljo Fatima ug kon aprubahan ni Cebu City Mayor Tomas Osmeña hayan makadawat og subsidy rental ang mga maapektuhan kay dili usab mahimo nga ilaha kining pasagdan.

Ang gi-propose nga subsidy rental sa DWUP kang Osmeña moabot sa P12,000 alang sa tulo ka buwan ug kini maoy ilang ibayad kon makakita na sila og kaabangan nga temporaryo nilang kapuy-an.

Subay niini gitataw ni Alcoseba nga dili sila makapugong sa mga residente sa barangay nga naapektohan sa dakong sunog nga motukod og balik sa ilang pinuy-anan apan ang ilang hangyo nga light mater­ials lang ang gamiton ug dili concrete aron dili masayang ang igastong kwarta.