NABULABOG ang 11 ka mga tawo, upat niini mga babaye, sa dihang na-atlan nga nag pot-session sud sa inabangan nga balay sa target sa buy-bust operation sa Barangay Maribago, Lapu-Lapu City, niadtong Miyerkules sa gabii.

Ang usa sa babayeng nasikop front desk clerk sa usa ka hotel sa maong dakbayan.

Nanga-trap ang 11 ka tawo sa dihang gihamagan sa kapulisan sa Police Station 2 nga gipangulohan ni Sr. Inspector Felix Cleopas, inabagan sa Philippine Drug Enforcement Agency (PDEA) 7 ang balay nga gi-abangan ni Reil Geminez Roble o mas nailhan sa ngalang Abai.

Gitug-an ni Cleopas nga nagsige na sila og kadawat og taho gikan sa mga tawo sa dapit kalabot sa ilegal nga kalihokan sa balay ni Roble nga nahimutang sa Sityo Pasil, Maribago.

Gihulagway sa pulis nga nag-alirong pa ang mga manuyopay sa dako nga dining table. Sa pag-abli sa pulthahan sa atubangan sa balay kay nanuktok ang poseur buyer nabantang ang mga nag-pot session nga diha sa kusina.

Ang mga dinakpan naglakip nila ni Roble, 38; Allan Aying, 36; Mark Leo­nard Baaclo, 34; Erwin Romero, 40; Jake Hiyas, 29; Ramil Hiyas, 49; Roland Buhawe, 35; Jenjen Alindajao, 21; Ahmina Amaya Nazamil, 29, front office clerk sa Bella Vista Hotel; Ayna Marie Nacilla, 23; Metchie Estaniel, 30 nga gikan sa laing barangay nga mohugpa lang sa area sa higayon nga mogamit sa illegal drugs.

“Ang mga mopalit (drug users), diha (balay) ra pud mosuyop,” matod ni Cleopas sa dihang nahinabi sa Superbalita Cebu.