SUGOD sa Hunyo 1, dakpon na sa Land Transportation Franchising and Regulatory Board ang mga bus pasaheroan nga way Global Navigation Satellite System (GNSS) device.

Si LTFRB 7 Assistant Regional Director Reynaldo Elnar niingon nga tumong sa pagtaod sa GNSS device ang pagtino kon sobra ra ba ka kusog ang dagan sa bus ug kon nilabyog kini sa laing lugar gawas sa naandan ug gitugot nga rota niini.

“Simbako naay disgrasya, so mahibaw-an kon nag over speeding ba ang drayber kay usahay moingon man ang drayber nga hinay ra ang iyang dagan. So pinaagi ana, ma-determine na ang speed sa drayber,” pahayag ni Elnar sa Superbalita Cebu.

Siya nibutyag nga hangtod sa Mayo 31, 2017 lang ang gihatag nga tagal sa ilang ulohan nga buhatan alang sa pagtaod og GNSS devices sa mga bus unit sa Sugbo.

Subay kini sa gipakanaog nga Memorandum Circular No. 2016-015 nga nag-amendar sa MC No. 2016-007nga nag-usab sa skedyul sa pagtaod sa GNSS device sa mga publikong bus.

Sa mao nga kamandoan, ang mga provincial bus nga mosulod sa Metro Manila ug Intra-Regional buses kun mga bus nga nagbiyahian sud sa rehiyon, gitagalan hangtod sa Mayo 31, 2017.

Alang sa mga bus nga magbiyahian sa Metro Manila dunay tagal nga Hunyo 2017 hangtod sa Septi­yembre 30, 2017.

Samtang alang sa Inter-Regional buses kun mga bus nga mobiyahe gikan sa usa ka rehiyon ngadto sa laing rehiyon, apan dili mosulod sa Metro Manila kay sa Oktubre 1, 2017 hangtod sa Enero 31, 2018.

Si Elnar nipasidaan ang mga bus nga masakpan wa motuman sa kamandoan pamultahon og P5,000.

Siya nidugang nga nalangay ang pagpatuman sa kamandoan gumikan sa motion for reconsideration nga giduso sa mga bus operator nga naghangyo nga ioktaba una ang implementasyon niini.