BISAN kon sunodsunod ang pagsaka sa presyo sa mga produktong petrulyo ug nipaumento sa pletihan ang usa ka bus company, nauyonan sa mga bus ug mini bus operators sa lalawigan sa Sugbo nga dili una mangayo og umento sa pletihan.

Atol sa tigom kagahapon, nasabutan sa mga sakop sa Cebu Provincial Bus and Mini Bus Operators Cooperative nga padayon ipatuman ang nalatid sa memorandum of agreement nga P5 ang pangayuon sa unang lima ka kilometros ug dugang P1 sa matag mosunod nga kilometro.

Mas ubos kini sa gitugot nga pletihan sa Land Transportation Franchi­sing and Regulatory Board nga P6 sa unang lima ka kilometros ug dugang P1.20 sa matag mosunod nga kilometro.

Nakab-ot sa mga bus ug mini bus operators ang kasabutan bisan kon ang Vallacar Transit, ang tagdumala sa Ceres bus, nipahamtang og P10 nga dugang pletihan.

Si Julie Flores, chairman sa CPBMBOC diin sakop usab ang mga miyembro sa CSMBOA ug CPBOA, nibutyag nga mangayo lang sila og umento sa pletihan o bakwion ang MOA kon mosaka na sa P37 ang presyo sa matag litro sa krudo base sa presyo sa gasolinahan sa dakbayan sa Carcar.

Sa kasamtangan, ubos pa sa P36 ang presyo sa krudo sa mao nga gasolinahan, dugang niya.

Sa samang tigom, nahibaw-an nga way pagtugot gikan sa LTFRB board ang ubos nga pletihan nga gipatuman sa mga bus ug mini bus sa lalawigan sa Sugbo sanglit wala pa maduso sa LTFRB 7 ngadto sa ulohang buhatan niini ang kopya sa MOA nga gilagdaan niadtong Disyembre 2014.

Ang MOA gipirmahan tali ni Gobernador Hilario Davide III ug mga opisyal sa Cebu South Mini Bus Operators Association, Cebu Provincial Bus Operators Association ug Cebu North Mini Bus Operators Association (CNMBOA).

Si LTFRB 7 Assistant Director Reynaldo Elnar nitug-an nga wa masang-at ang MOA gumikan kay wa mopirma si Richard Corominas, presidente sa CPBOA.

Sa naunang interview kang Corominas, nananghid kini sa iyang mga kauban nga operators nga dili mopirma sa dokumento sanglit ang ubang bus operators nireklamo nga impractical ang P1 nga laslas sa pletihan labi na mahal ang presyo sa spare parts, ligid ug lubricants.

Gumikan niini, nabalaka ang ubang operators ug sakop sa CPBMBOC, nga basin og mapasanginlan sila nga nag-undercharging tungod kay wa kini pagtugot sa LTFRB board.

Si Lyndon Dacer, mi­yembro sa CPMBOC, nipadayag og kabalaka nga kon mangayo sila sa tukma nga pletihan nga gitugot sa LTFRB, maminosan ang ilang mga pasahero ug kon di usab sila motuman niini mapansanginlan sila nag-undercharge.

Si Elnar nipahibawo ubos sa ilang lagda ang undercharging ug overcharging kay kalapasan ug pamultahon ang masakpan naghimo niini.