KON dili sa Australia posibling adto sa Middle East mapahigayon ang umaabot nga away ni Manny Pacquiao ug Jeff Horn.

Kini maoy gibutyag ni Bob Arum, ang bigboss sa Top Rank Inc.

Sa taho sa boxingscene.com, si Arum nagkanayon nga mahibaw-an ang final nga venue sa maong away nga gikatakda sa Abril 23 mga napulo ka adlaw gikan karon.

Ang beteranong promoter padayon nga nakigsabotsabot sa Duco Events nga maoy iyang kaayuda sa promotions kinsa nagtinguha usab nga sa Australia kini mapahigayon.

“I just got off the phone with them, once they select the state it’s going to be at, whether it’s Brisbane or Melbourne, then we’ll go forward with an announcement and so forth,” dugang ni Arum.

Subsub karon ang paglihok sa kampo ni Horn nga gani gustong himamaton ug kombinsihon niini ang premier sa Queensland nga makatabang sa pinansiyal nga aspeto aron kini mapahigayon sa Suncorp Stadium sa Brisbane, ang lugar ni Horn.

Apan ang adviser ni Pacquiao nga si Michael Konz ang nangita usab karon og paagi nga madala kini ngadto sa Middle East.

“Michael is part of the team. I think Michael is talking to people in the Mid-East as our we. In other words, you never know who you’re dealing with in the Mid-East. You never know what’s going to come to fruition,” matod ni Arum kinsa pranka nga mibutyag nga kon asa ang dakong kuwarta adto kini nila ipahigayon.