Gipahilum ni Durant

WAY luna sa kaikog ug kaluoy ang gipa­kita ni Kevin Durant ngadto sa iyang kanhi team pinaagi sa pagpakatap og 40 puntos sa dihang gilubong sa Golden State Warriors ang Oklahoma City Thunder, 121-100 kagahapon.

Kini bisan pa man og nakuha ni Russell Westbrook ang iyang ika-21 nga triple-double alang sa Thunder pinaagi sa 27 puntos, 15 ka rebounds ug 13 ka assists.

Sa duha ka duwa batok sa OKC, si Durant mipila na og 79 puntos. Kagahapon milangkat usab siya og 12 ka rebounds.

Si Stephen Curry midugang og 24 puntos ug walo ka assists ug nakatampo usab og 14 si Klay Thompson kinsa lab-as pa gikan nakadalikyat sa Bay Area aron pag-atender sa problema sa iyiang pamilya.

Napahamtangan og flagrant 1 foul ang sentro sa Golden State nga si Zaza Pachulia sa dihang iyang natumba si Westbrook kinsa mipahimangno nga mobawos gyud siya.

Hugot pa nga nakakombati ang Thunder sa first half, apan ang duha ka triples nila ni Durant ug Thompson maoy nagduslit sa 26-13 nga rally ug didto nagsugod ang dominasyon sa Warriors nga nakaposte og 93-78 sa pagkatapos sa third quarter.

Sa laing duwa, gipakaging sa New York Knicks ang inilog ug host Boston Celtics, 117-106. Si Derrick Rose mitali og 30 puntos alang sa Knicks aron pangulohan nga makalabni kini og kadaugan sa ilang pagpanulong.

Ang New York miduwa nga wala ang ilang starters nga sila si Kristaps ug Joakim Noah. Si Isaiah Thomas mirehistro og 39 pun­tos, iyang ika-13 sa karon nga season nga na­kakulit siya og 30 puntos o kapin.

Samtang daw sa wa damhang naka­bul­hot ang Indiana Pacers human mabiyai og 22 pun­­tos batok sa Sacramento Kings nakamaniho pa gi­haon kini sa pagdibuho og 106-100 nga kadaugan.

Nagkumboya si Paul George (24 puntos) ug si Jeff Teague (22 puntos ug 11 ka as­sists) sa pag-aswat sa Pacers ngadto sa kalampusan.

Ang Houston Rockets mibungkag sa Milwaukee Bucks, 111-92. Si James Harden adunay 38 puntos, walo ka assists ug unom ka rebounds alang sa Rockers.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph