SA UNANG higayon, himuon ang State College Universities Athletic Association (SCUAA) Meet nga salmotan og 1,000 atleta karong Enero 25 hangtud 28 didto sa Davao Oriental State College of Science and Technology (DOSCST) sa Mati City, Davao Oriental.
Atol sa Davao Sportswriter Association (DSA) Forum didto sa SM City Annex, Activity Center niadtong Huwebes, Enero 19, gipahayag ni University of Southeastern Philippines (Usep) sports director Jose Alther Rivera nga ang mga atleta magtigi gikan sa unom ka State University and Colleges sa rehiyon sa Davao.
"Ang Usep may team A and B na 340 athletes, Davao Oriental, Comval State College, Southern Philippines Agri-Business Marine and Aquatic School of Technology, Davao del Norte State College and University of the Philippines. They will compete in 19 events," ni Rivera.
Ang maong events mao ang archery, arnis, athletics, badminton, baseball, basketball, chess, football, futsal, karate do, lawn tennis, sepak takraw, softball, table tennis, taekwondo, volleyball, dance sport, beach volleyball ug swimming.
Gawas niini, duna say arts and culture nga tigian sa mga partisipante.
Dugang niya nga sunod tuig posibleng ang Usep ang mag-host sa maong torneyo diin ang tumong niini mao ang pagdiskobre sa mga dunay potensyal nga atleta gikan sa mga state universities.
Si Rivera uban nagsulti nga ang pag-abot sa mga delegado kaong Enero 25 nga sundan sa solidarity meeting, parada, ug pang aktibidad.
Mga mokampeyon sa matag event maoy morepresenta sa rehiyon alang sa SCUAA national meet karong Pebrero 19 didto sa University of Batangas.