DIGOS CITY -- Katorse ka mga kanhi sakop sa rebeldeng New People's Army (NPA) ang nakadawat og ayudang panginabuhian human sila mitahan sa 73rd Infantry Battalion (IB), Philippine Army.
Gitunol sa kasundalohan ang kantidad P700 mil nga ayudang pinansiyal ilawom sa Comprehensive Local Integration Program (Clip) atol sa usa ka programa sa kapitolyo niadtong miaging adlaw.
Ang simpleng seremonyas gisaksihan nila Provincial Director Remedios Baldovino sa Department of Interior and Local Government, Provincial Social Welfare and Development officer Geraldine Lano, 1002nd Brigade Commander Lieutenant Colonel Allan Odal, ug pamuno sa 73rd IB nga si Lieutenant Colonel Ronnie Felix Babac kinsa maoy nitunol sa tseke nga kantidad P50,000 alang sa 14 ka mga kanhi komunista.
Si Babac nagbutyag nga laing 13 ka mga kanhi NPA ang mitahan kanila atol sa katapusang bulan niadtong 2016 ug nakadawat sab kini og kantidad P305 mil nga ayuda sa Clip.
Ang mga nisurender nakadawat og tag P15 mil nga tseke ug laing P10 mil nga tseke matag usa gikan sa kagamhanang probinsiyal.
Sumala sa datos, adunay 106 ka mga kanhi rebelde na ang mitahan sa Davao del Sur, Davao Occidental ug Sarangani Province nga ilawom sa area of responsibility sa 73rd IB.
Matud ni Babac nga 75 kanila ang nakadawat na og livelihood assistance kantidad P65,000 matag usa ug sa kinatibuk-an anaa na sa P4,875,000 ang napagawas nga pundo sa programa.
Nasayran nga aduna say uban nga di kuwalipikado sa programa apan gipangitaan kini og paagi sa kasundalohan.
Laing kantidad nga P1,300,000 nga Clip assistance ang nahatag sa 24 nga mga kanhi NPA niadtong 2016 human sila mitahan sa militar gikan niadtong 2013-2014.
Ang CLIP usa ka programa sa nasyonal nga kagamhanan aron matabangan ang mga kanhi komunista nga mibiya sa kalihukan aron manginabuhing normal ug malinawon kuyog ang ilang pamilya.
Naglaum ang opisyal sa militar nga gamiton sa maayong paagi sa mga kanhi komunista ang ilang nadawat nga salapi aron molambo ang ilang pamilya. (OBD)