HUWEBES, Enero 19, gipaubos na sa state of calamity ang probinsya sa Misamis Oriental.

Kini ang gikumpirma ni Governor Yevgeny Emano taliwala anaa kini sa kaulohan ning panahona human gipatawag tanan Gobernador sa nasod ni Presidente Rodrigo Duterte sa Malacañang.

Kini human padayon nga nakasinati og pagbaha ang pipila ka mga lungsod sa sidlakan ug kasadpang nga bahin sa Misamis Oriental.

Una na nga mideklarar og state of calamity ang lungsod sa Initao ug Lagonglong ug niadtong adlaw’ng Miyerkules, mideklarar sab ang lungsod sa Medina.

Giklaro sab ni Provincial Disaster Risk Reduction Management Department (PDRRMD) officer-in-charge Vincent Dy nga sa deklarasyon sa tibuok probinsya awtomatikong kober na niini ang tibuok probinsya.

Sugod kadlawon Huwebes, nakasinati ug kusog nga pag-ulan ang pipila ka lungsod sa probinsya gumikan sa tail end of a cold front.

Lakip sa mga lungsod nga gipaubos sa preemptive evacuation mao ang lungsod sa Medina, Tagoloan, Balingasag, Lagonglong, Balingoan, Magsaysay ug dakbayan sa Gingoog.

Aduna usab pagdahili sa yuta nga natala Huwebes apan deretso kining na clear sa kagamhanan sa lungsod sa Naawan.

Usa sab ka sakayan ang napalgan didto dakbayan sa Iligan nga adunay tatak nga lungsod sa Balingasag.

Sa pagsulat ning balita, padayon gihapon ang monitoring sa PDRRMD sa kahimtang sa uban lungsod labina wala pay niabot nga report gikan kanila. (SVB)