NAGPATALA sa kapolisan ang usa ka ulitawo human nga gitionan sa usa ka lalaki nga buot mo-ilog sa rubber boots niini niadtong Miyerkules, Enero 18, sa Paglaum, Barangay Camaman-an, dakbayan sa Cagayan de Oro.
Ang nagpatala nailang si Joey (bansagon gitago), 23, ulitawo ug lumulupyo sa maong dapit.
Sa nahipos nga impormasiyon, gikabutyag nga samtang kamulo ang mga biktima og panglimpyo sa maong dapit tungod sa lapok human sa baha, miabot ang suspek nga naila lamang sa ngalan nga Ham.
Nagdala og kutsilyo ang suspek ug gition sa biktima kay buot niini kuhaon ang gisuot nga rubber boots.
Nahadlok ang mga biktima tungod sa dala niini nga kutsilyo tungod lamang sa boots apan wala kini sila nagpadala sa hulga sa suspek.
Nagtoo ang kapolisan nga posibleng tungod na usab sa kaguol ug kabalaka sa suspek hinungdan nga wala na kini makahuna-huna og insakto ug nabuhat ang maong pagpani-on.
Sa pagsulat niini nga balita, ang insidente nakatala na sa buhatan sa kapolisan ug giduso na sa Barangay Lupon alang sa tukmang disposasiyon.