TULO ang natalang missing sa padayon nga pag-ulan sa sidlakang bahin sa Misamis Oriental.
Sa gipagawas nga update sa kagamhanan sa Misamis Oriental Huwebes, Enero 19, ang mag-amahan nga sila si Joel Sagiway Sr. ug anak nga si Joel Jr., nga taga Barangay Bantaawan, dakbayan sa Gingoog, ang padayong gipangita ning panahona.
Uwahi silang nakita sa payag nga gipuy-an sa umahan apan wala na kini makita ning panahona lakip ang ilang puloy-anan.
Dili pa matumbok sa kagamhanan kung naanod sa baha o natabunan sa nagdahili nga yuta ang mga nawala.
Si Gobernador Yevgeny Emano nibutyag nga naningkamot ang team sa Provincial Disaster and Risk Reduction Management Council (PDRRMC) nga makita ang mag-amahan nga pabiling missing karong panahona.
Samtang laing usa ka bata nga si Rogenilio Antipolo, 10 anyos taga Barangay Lanao lungsod sa Alubijid, Misamis Oriental, ang pabiling missing ning panahona.
Gibutyag ni Emano nga Lunes pa diay kini nawala atol sa low pressure nga nasinati, apan Huwebes lamang kining gipahibalo sa iyang apohan nga mao si Leonora.
Mismong apohan niini wala masayod kung naanod ba kini sa baha ug nalumos tungod kay hangtod karong panahona, wala pa mahibalik sa ilang puloy-anan.
Sa pagkakaron, padayon ang pagpangita sa bata sa mga rescue team sa lungsod.