WA pay nakit-an nga ikahulip si Mayor Tomas Osmeña sa mga posisyon nga biyaan sa tanang mga barangay official sa Barangay Ermita nga gipangsuspenso og unom ka buwan sa Office of the Ombudsman Visayas.

Gumikan pagkabakante sa tanang elected officials sa barangay, kinahanglan nga adunay itudlo ang mayor nga maoy temporaryong mohulip nilang Kapitan Felicisimo Rupinta ug pito ka mga konsehal.

Apan gikinahanglan kining aprobahan sa Department of Interior and Local Government (DILG).

Tumong niini mao nga di mabiyaan ang batakang serbisyo sa barangay ug makahimo gihapon sila sa paglihok sa mga programa alang sa barangay.

Matod ni Osmeña nga iyang pahimuslan ang temporaryong pagkawagtang ni Rupinta ug kaubanan sa barangay Ermita aron paglimpyo niini gikan sa ilegal nga sugal ug drugas.

Iyang gipasabot nga niining pagkasuspenso sa iyang kontra sa pulitika kay si Rupinta kaalyado sa Team Rama, di na kini makagamit sa iyang impluwensiya sa barangay.

Matod niya nga atol sa pangatungdanan ni Rupinta, nilambo ang drug business nilang Rowen Secretaria, alyas Yawa.

Nalipay si Osmeña sanglit ang mga anti-drug operatives makapadayon sa ilang trabaho sangit ang Ermita maoy usa sa gihugpaan sa shabu ug ubang matang sa illegal nga drugas.

Si Rupinta, sa iyang bahin nagkanayon, nga moduso sila og motion for reconsideration sa pamasin nga paminawon ang ilang tingog ug mausab ang hukom sa Ombudsman.

Ang kapitan wa niingon nga si Osmeña maoy nagpaluyo sa ilang pagkasuspenso apan iyang gibutyag nga adunay dako nga pulitiko nga nigamit sa iyang impluwensiya.

Ang mayor, sa iyang bahin, nagkanayon nga wa siyay kalambigitan sa nahitabo sa kampo ni Rupinta kay ang nakaingon niini mao ang paghitak sa drugas sa barangay.

Gipasanginlan usab sa kapitan ang mayor nga gituyo kini aron makapahimutang na siya sa iyang mga kaalyado sa barangay nga giharian ni Rupinta sulod na sa pipila ka dekada.

Si Osmeña nikompir­mar nga mobutang siya sa iyang mga tawo sang­lit gusto niya nga mapapas ang ginadiling drugas sa barangay.

Samtang si DILG Regional Director Rene Burdeos niingon nga maghuwat lang sila sa mando sa ilang ulohang buhatan a­lang sa pag-serve sa mando sa Ombudsman.