Frias: Halimaw nga pitch ni Alvarez

SA WALAY duha-duha, si Arthur "A-Art" Alvarez gayud ang kinamaayohang pitcher sa fast pitch softball sa pulo sa Mindanao.

Gawas ana, gikahadlokan ang iyang pitching sa tibook nasod niadtong gi-scout siya sa RP Youth mga edad pa siya sa 15 pataas.

Sa edad nga 55 anyos karon, natala na sab ni Alvarez ang usa na sab ka “pefect game” batok sa Barangay Talusan atol sa Balingasag Open Fast Pitch Softball bagohay lang.

Nasaksihan ko una si Alvarez nga nitala og perfect game niadtong usa ka torneyo sa Cagayan de Oro Baseball and Softball League (diin karon nawagtang na) sa 2002.

Ang perfect game usa ka termino sa baseball ug softball nga buot pasabot nga walay bisan usa ka batter o hitter ang gipatunob sa pitcher sa first base.

Sa ingnana, pulos gipang-strikeout sa pitcher ang matag batter nga buot mopalo.

Niadtong tungora, mabati nako ang kahadyong ug kakusog sa iyang labay.

Naa pa siya'y signature pitch nga curveball nga mangalit lang og korbada ang bola gamit ang duha lang niya ka tudlo.

Matingala nalang ang batter nga makabati siya og tingog sa kahoy nga gibugha pagdawat sa catcher.

Apan, pipila nalang kanato ang makakita niya mag-pitch tungod nga wala na'y baseball ug softball nga torneyo ang gimugna dinhi sa Cagayan de Oro.

Gani, usa siya sa nagsakwat sa Misamis Oriental Softball Team pagangkon sa kampyonato niadtong 2nd Mindanao Frienship Games sobra duha ka dekada niagi diin gipahigayon dinhi.

Kon kinsa makadalikyat sa Kaamulan Festival, pwede ninyo makita ang iyang halimaw nga mga pitch didto sa Bukidnon Open.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph