NAKAANGKON og walo ka samad dinunggaban ang usa ka menor de edad nga bayot human giluba niadtong Huwebes sa buntag, Enero 19, sa P-4, Dalwangan, Malaybalay City.

Dead on arrival nga gidala sa Bukidnon Provincial Medical Center nga nailang si Dan Bert (bansagon gitago), 16, usa matud pa ka bayot ug residente sa maong dapit.

Human sa manhunt operation sa kapolisan sa pagpangulo ni Malaybalay Police Station Chief Alfredo Ortiz niadtong Biyernes alas 9 sa buntag, malampusong nasikop ang mga suspetsado nga nailang sila si Jandy Maravilla, 20, Nicholas Baclaan, 20, ug Kim Loyd Albor, 23, diha sa nahisgutang dapit diin nahitabo ang krimen.

Sa pakighinabi sa SunStar SuperBalita kang Ortiz, gibutyag niini nga nahinaykan sa mga suspetsado ang biktima human nga nagsige kini og panguot sa mga suspek kay lage lango na sa ilimnong makahubog.

“Ang biktima bayot diay to, mura daw siya’g gakuot-kuot, gi-harass-harass sila pero sila’y kauban sa inum, dala na gihapon to sa kahubog gihapon kay kung wala sila nag-inom di man to nila mabuhat, paghubog-hubog na gikuot kuot daw sa bayot, nasuko sila mao to ila gidunggab,” pahayag ni Ortiz.

Nakaangkon og walo ka mga samad dinunggaban si Dan Bert human gitabangan og dunggab sa tulo ka mga suspetsado hinungdan sa hinanali niini nga kamatayon.

Sa pagkakaron, ang maong mga suspek ang nagtingkagol na sa tinugyanan sa kapolisan alang sa pag-atubang sa tukmang kaso nga ipasaka batok kanila.