IMA ang nasikop sa managlahing operasyon sa kapulisan inubanan sa Philippine Drug Enforcement Agency (PDEA) 7 batok sa ilegal nga drugas sa lalawigan sa Sugbo, lakip na niini ang high value target sa lungsod sa Cordova.
CONSOLACION
Niadtong Biyernes sa gabii, nasikop sila si Angeito Mindajao, 56, ug Maria Janet Bagalanon, 49, molupyo sa Sitio Riverside Barangay Poblacion Oriental, lungsod sa Consolacion sa lalawigan sa Sugbo.
Sigon sa pamahayag ni SPO2 Francisco Perez sa Consolacion Police Station nga ang grupo ni P/Sr. Insp. William Homoc ang nihimo sa buy-bust operation sa nahisgutang dapit pasado alas 8:00 sa gabii niadtong Biyernes ug ilang naaktohan ang mga suspek nga nagbaligya og illegal nga drugas.
Nakuha gikan kang Bagalanon ang lima ka gagmay’ng pakete sa gidudahang shabu ug buy-bust money nga P200.
Dugang ni Perez, pag-abot sa grupo ni Ceralde sa gawas balay sa ilang target nga si Mindajao, gisugat sila ni Bagalanon ug gihulagway nga pagdawat sa buy-bust money ni Bagalanon nisaka kini sa balay ug pagbalik kuyog na niini ang ilang target dayon mihatag sa usa ka gamay’ng pakete sa gidudahang shabu sa ilang buyer, dali unta kini nga nakabantay ug misuway pag-ikyas balik sa balay apan natanggong kini ug nasikop.
CORDOVA
Sa Cordova, nasikop usab ang top 4 high value target drug personality sa ilang lugar human masakmiti og armas de fuego ug nasakpan nga nagbaligya og ilegal nga drugas apil ang iyang kauban niadtong Biyernes sa hapon.
Ang mga suspek mao sila si Erwin Inoc, 45, ug Gian Aniana, 28, nga nanimuyo sa Purok 3, Barangay Bangbang, Cordova.
Matod ni SPO1 Renante Marababol sa Cordova Police Station nga nahinabi sa Superbalita Cebu nga gipangulohan sa ilang hepe nga si P/Sr. Insp. Clemente Ceralde Jr. ang buy-bust operation sa nahisgutang dapit pasado alas 3:00 sa hapon niadtong Biyernes ug ilang naaktohan ang mga suspek nga nagbaligya og illegal nga drugas hinungdan sa pagkasikop niini.
Nakuha gikan sa possession ni Inoc ang duha ka mga bulto sa gidudahang shabu nga mokabat ngadto sa P118,000 apil na usab niini ang usa ka pogakhang nga adunay 2 ka mga buhing bala sa shot gun. Samtang nakuha usab gikan kang Aniana ang duha ka gamay’ng pakete sa gidudahang shabu ug ang buy-bust money nga P300.
Dugang pamahayag ni Marababol nga usa sa mga drug surrenderer si Inoc sa Oplan Tokhang apan nibalik gihapon kini sa ilegal nga kalihokan.
Nasuta usab nga high value target si Inoc tungod kay top 4 drug personality kini sa ilang dapit.
Gihulagway ni Marababol nga matod pa sa mga nakasaksi nga sila lang ang gibantayan sa mga surrenderer ug mobalik gihapon kini kon wala ang kapulisan nga magtan-aw sa ilang mga illegal nga kalihukan ug walay kwenta ang lista tungod kay kataw-an ra sila’ng mga pulis.
SIBONGA
Samtang sa lungsod sa Sibonga, nasikop usab ang usa ka 36-anyos nga lalake human masakpi nga nagbaligya og illegal nga drugas niadtong Biyernes pasado alas 5:00 sa hapon.
Ang suspek mao si Jun Windell Gimena, 36, minyo, ug taga Barangay Candaguit, Sibonga.
Si PO3 Eduardo Semilla sa Sibonga Police Station nagkanayon nga pinangulohan sa ilang hepe nga si P/Sr. Insp. Reynaldo Samson Geolin nagpahigayon sila og buy-bust operation sa nahisgutang dapit ug ilang naaktohan ang suspek nga nagbaligya og illegal nga drugas hinungdan sa pagkasikop niini.
Dugang pamahayag ni Semilla nga naa na sa ilang listahan si Gimena nga usa sa mga drug surrenderer sa ilang dapit ug nitahan kini niadtong Agusto 8, 2016 apan, tungod sa mga sulti-sulti sa mga tawo, ila kini nga gipanid-an og balik dayon nagpahigayon sila og buy-bust operation.
Nakuha gikan kang Gimena duha ka gagmay’ng pakete sa gidudahang shabu ug ang marked money nga P300.
Natanggong karon ang mga suspek ug nag-atubang sa ilang tagsatagsa ka mga kaso.(Niño B. Baldevino USJ-R Comm Intern)