GIPUSIL patay ang usa ka lalake sa wa mailhing tawo sa Sitio Magay, Barangay Tangke, Siyudad sa Talisay, niadtong Biyernes sa gabii.

Ang biktima mao si Noel Dabatos Gabiana, 40, taga Sitio Atisan, Brgy. Cansojong, siyudad sa Talisay.

Alas 7:35 sa gabii sa dihang nakit-an sa ka­pulisan sa Talisay Police Station ang lawas sa biktima nga nalup-og ug nagkadugo sa karsada.

Matod ni PO1 John Ilustrisimo sa Talisay Police Station nga naglakaw si Gabiana sa karsada sa dihang gipusil sa wa mailhing tawo nga nagsakay og trisikad nga gimaniho sa wa mailhing tawo.

Gipusil kini sa tulo ka mga higayon gamit ang wala mailhing kalibre sa armas nga maoy hinungdan sa iyang kamatayon.

Padayon ang imbestigasyon sa kapulisan sa motibo sa pagpusil kang Gabiana.(Maebelle Rellon, USJ-R Journalism Intern)