KOMPIRMADO nga ang lawas nga nakit-an nga naglutaw-lutaw sa kadagatan sa isla sa Barangay Noknokan, Talibon, Bohol mao si Benjamen Orola, ang missing sa nalunod nga cargo vessel nga mv Meridian Tres.
Matod ni Lieutenant Junior Grade Jimmy Berbo, commander sa Tagbilaran Coast Guard, nga nahinabi sa Superbalita Cebu kagahapon, nga alas 6:00 sa buntag kagahapon dihang gi-claim ang lawas ni Orola.
Ang asawa ni Orola nga si Violeta ug ang anak niini nga si Joy ang ni-claim sa lawas sa biktima gikan sa Talibon Funeral Services.
Dugang ni Berbo nga niadto pang Huwebes sa buntag nila nadawat ang taho sa napalgan nga lawas sa maong isla.
Hapon na dihang naabot ang ilang sakop sa pantalan sa Talibon diin gideritso ang lawas sa punerarya.
Matod ni Berbo nga tungod sa sulog sa dagat anaa paingon sa amihanang bahin sa Bohol mao nga didto napadpad ang lawas ni Orola.
Niadto ganing Miyerkules duha ka container vans ang napadpad gihapon sa susamang barangay diin ila kining gibutang sa barangay hall sa Noknokan.
Kagahapon, gideretso sa pamilya ang lawas ni Orola sa Tagbilaran Airport paingon sa kaulohan.
Nasayran nga siya taga Tondo, Manila.
Si Orola mao ang missing nga tripolante sa nalunod nga barko niadtong Martes sa kadagatan sa Bohol ug Leyte nga gikan sa Sugbo ug paingon unta sa Tacloban, Leyte.