DEAD on arrival ang usa ka lalaki human kini nabanggaan og pribadong sakyanan niadtong Biyernes sa gabii, Enero 20, sa Opol, Misamis Oriental.

Patay na nga nahidangat sa Northern Mindanao Medical Center (NMMC) ning dakbayan ang biktima nga naila lamang nga si Dolerio, taga Bukidnon.

Sa nahipos nga impormasiyon gikan sa NMMC, nasayran nga gidala na lamang sa ambulansya sa Opol ang biktima human kini nabanggaan sa pribadong sakyanan.

Gidugang pa nga wala nabantayan sa drayber sa pribadong sakyanan ang biktima nga mitabok sa dalan tungod na usab kay ngitngit ang maong dapit.

Gibutyag nga atol sa panghitabo, ubos sa impluwensiya sa ilimnong makahubog ang biktima.

Nasayran nga boluntaryo usab nga mitahan ang drayber sa sakyanan human sa panghitabo.

Sa pagsulat niini nga balita, ang patay nga lawas ang kasamtangang anaa pa sa morgue sa tambalanan samtang padayon pa ang kapolisan sa pag-imbestiga sa tinuod nga panghitabo.