MAG-PITO na ka bulan ang bag-ong administrasyon ni President Rody. Daghan na ang nahitabo, ug daghan pa ang umaabot nga mahitabo.

Gawas sa mga batikos tungod sa "war on drugs" maayo ang resulta sa tanang survey sa iyang administrasyon. Mas taas pa ang iyang nakuha kung ikumpara sa tanang nahimong presidente sa nasud, bisan kadtong bar topnotcher, eksperto sa ekonomiya o Westpointer.

Daghan ang naghandom nga modala siya'g kabag-ohan sa Pilipinas ilabi na sa problema sa druga, kawad-on, walay disiplina ug pagpa-itoy sa langyaw'ng nasud.

Sud sa gamay nga panahon, napasurender niya ang minilyon nga gidudahang nahilambigit sa ilegal nga druga og kriminalidad.

Gibalik ug gipalagsik niya ang hinabing pangkalinaw dili lang sa Mindanao kon dili sa tibuok nasud.

Gani karong bulana, pagasugdan ang third round sa peace talks tali sa GPH ug sa CPP-NPA/NDF.

Siya sab ang presidente nga nakapangalap og pinakadakong foreign aid nga binilyon ka pesos gikan sa mga dili kasarangang tinubdan sama sa China, Russia, ug Japan.

Nidagsa pa ang hanyag sa pag-alayon sa negusyo ug pakighigala human nideklara ang presidente og independent foreign policy nga abli sa tanang gusto og kalinaw ubos sa landong sa patas nga relasyon isip sovereign nation.

Gikinahanglan sab nga pakusgon sa administrasyon ang iyang base sa kalungsuran ug kabarangayan sa tibuok nasud aron moduyog kini sa mga kausaban nga gidamgo sa bag-ong liderato.

Busa natukod kining Department of Participatory Governance (DPG) ubos sa opisina ni Cabinet Secretary Leoncio "Jun" Evasco.

Usa sa mga lakang niini mao ang paglusad sa kampanyang Kilusang Pagbabago (KP) ug pagtukod og mga KP chapters sa nagkalain-laing probinsiya ug munisipalidad sa nasud.

Buot sa DPG nga mag-organisa ang katawhan ilabi na kadtong nituo ug nisalig sa pamunoan ni PRody aron matabangan ug makatabang sa gidamgong tinuod nga kalamboan sa nasud.

Usa sa nidawat sa hagit mao ang Partnership for Mindanao Change and Development (PMCD) nga adunay dul-an 2,000 na ka miyembro gikan sa tulo ka rehiyon sa Mindanao sama sa Northern Mindanao, Davao, Soccsksargen, ug Caraga.

Pormal kining natukod isip non-government organization nga rehistrado sa Securities and Exchange Commission niadtong Septyembre-Oktubre 2016, diin napili isip presidente si Partner Jun Magulamas sa Isulan, Sultan Kudarat ug Partner Roen Caesar Cardinal isip executive director.

Buot sa PMCD nga ipakaylap ang programa sa kalamboan sa bag-ong administrasyon ngadto sa katawhan sa kabanikanhan ug moayuda aron magmalampuson kini.

Apan una kini mahimong tulay sa tabang gikan sa gobyerno, paninguhaon niini nga mapalig-on ang iyang estraktura, sistema ug gingsakpan aron malikayang mahimong laing "Napoles scam" nga gigamit sa bungutong politiko ug opisyal sa gobyerno sa ilang kaugalingong interes.

Motindog kini sa iyang kaugalingong paningkamot samtang makiglambigit sa DGP ug KP aron maseguro nga nag-alayon kini sa maayong laraw sa bag-ong administrasyon. Kagahapon gi-induct ni Atty. Joel Mahinay, assistant secretary sa DPG sa Seagull's Beach Resort sa Punta Dumalag ang dul-an 100 ka mga opisyal sa rehiyon, probinsiya ug munisipalidad nga gilangkuban niini.

Wala makatambong si Undersecretary Joselito "Penpen" Libres tungod sa nahaunang eskedyol sa kaulohan. Congrats sa tanang Partners!