MIDAGAN ug nagpa-blotter sa kapulisan sa San Pedro Police Station ang usa ka lalaki human siya gihagad og sex sa babaye nga iyang nakalalis sa dalang San Pedro, dakbayan sa Davao, Biyernes sa gabii.
Mipatala sa San Pedro PNP ang usa ka Arvin (bansagon gitago sa SuperBalita), 23, ulitawo, taga Kasilak, Barangay 76-A Bucana ning dakbayan, kay gihagad siya og sex sa babaye nga si alyas Mariel.
Subay sa blotter nga natala sa presinto dos, nasayran nga nabaktas si Arvin ug iyang nadasmagan si Mariel sa sidewalk sa San Pedro hinungdan nga gihampak siya sa bag sa babaye.
Giingong nga napungot og maayo si Mariel human naguba ang iyang bag sa pagbunal kang Arvin, hinungdan nga mitubag sab ang lalaki kay wa niya gituyo nga madasmagan siya.
Taliwala sa ilang panaglalis, dihang molakaw na si Arvin, gihagit naman hinuon siya ni Mariel nga mag-sex na lang sila aron mawala ang iyang kasuko ngadto kaniya.
Dihang nadunggan ni Arvin ang giingon ni Mariel nga mag-sex sila, mikaratil kini'g dagan ug nagpa-blotter sa kapulisan.