Lamberto G. Ceballos

Cawayan, Dalaguete, Cebu

LAWOM na ang gabii apan wa gihapon batiag katulugon si Elik samtang naghigda sa kama tupad ni Monica, iyang asawa, nga pwerte nang nakahagok. Nagdibal sa iyang hunahuna ang daghang butang kabahin ning kampanya sa gobyerno batok sa ginadiling drugas. Daghan na ang miboluntaryo pag-ampo sa kapulisan nunot sa OPLAN: TUKHANG, diin ang mga pulis manuktok sa mga balay sa mga gikatahapang ‘drug pusher’ ug mga ‘adis-adis’ ug mohangyo nga mohunong na sila sa ilang dautang buhat. May duha na ka gikatapang ‘drug lord’ ang nailhan sa kapulisan.

Ang usa namatay kay misukol sa mga pulis nga buot modakop kaniya. Ang ikaduha mi-surender ug anaa karon magtingkagol sa prisuhan.

Kaganinang udto gika-estorya ni Elik si Bernan, usa ka barangay tanod nga iyang higala. Nahibalo kini nga sekreto siyang namaligyag shabu.

“Naa ka sa listahan sa mga pulis, Bay Lik. Maaypa ngaling mo-surender ka. Tugotan tingali kang makapiyansa samtang husayon ang kaso batok kanimo,” sugyot ni Bernan.

“Kuyaw man, Bay Bern, kon mo-surender ko. Basig human ko moampo sa kapulisan tirahan ko sa mga ‘vigilante.’ Si Lading bitaw nga mituman sa Oplan: Tukhang, gibirahan man sa ‘riders-in-tandem,’ ni Elik.

“Mao lagi hinuon. Apan sumala sa imbestigasyon ni SPO3 Jack Monsida, di man to mga vigilante ang mipatay kang

Lading, Mga ‘pusher’ man kuno to sila nga nailhan ni Lading ug nahadlok nga itug-an sila sa kapulisan!”

“Mao nay akong gikahadukan, Bay Bern! Kon mo-surender ko sa awtoridad, basig tipion ko sa mga kauban kong ‘pusher!’ O di ba ipa-likidar ko sa ‘supplier’ nakog shabu nga ‘drug lord!”

“Mao pod lagi. Ako, Bay Elik, di lang ko manghilabot nimo kay higala ta. Naa ra nimo kon mo-surender ka aron magmalinawon ang imong tanlag. Adto na usa ko!” ni Bernan.

“Sige, Bay Bern. Salamat sa sugyot!” paagpas ni Elik.

Kaadlawon na. Wa gihapon mahikatulog si Elik. Sukad milingkod si Digong pagka Presidente sa Pinas ug gilusad ang kampanya batok sa ginadiling drugas ubos sa pagdumala ni General Bato, wa na siyay maayong kinatulgan. Wa nay kalinaw ang iyang hunahuna. Wa siya mobiya sa pagpalusot og shabu kay wa siyay laing pangita nga makahatag sa iyang pamilya sa inadlaw nga panginahanglan.

May duha ka anak sila si Monica, pulos lalake ug nag-eskuyla pa sa elementarya. May higayon gani nga buot siya maghikog aron matibway ang tanan niyang problema. Misantop sa iyang hunahuna ang sugyot ni Bernan. Gipiyong niya iyang mga mata.

Pagka ugma sa buntag sayo siyang miadto sa presinto sa kapulisan sa ilang barangay aron pag-surender. Apan nianang pagka gabii nahipugwat siya dihang nabati ang subsob nga tuktok sa pultahan sa ilang balay. ‘Sila na karon,’ ni Elik nga nagtuo nga  may mga pulis naghimo og Oplan: Tukhang. Mibangon siya aron ablihan ang pultahan.

Dihang naabli na ang pultahan nasugat sa iyang panan-aw ang duha ka tawo nga nag-diyaket og itom ug nagpurong og itom nga ‘bonnet’ sa ilang ulo.

“Maayong buntag, Bay Elik!” timbaya sa usa. Sinati niya ang tingog niini.

“U-Unsay ato ninyo, B-Bay Gino?” ni Elik nga mibati og kahadlok.

“Nakaila lagi nimo, Gin, bisan nag-bonnet ka!” matod sa kauban ni Gino.

“Nia mi, Bay Lik, kay gisugo mi ni Mr. XXX para ini,” ni Gino nga mition sa iyang kalibre .45 nga pistola kang Elik, dayon gikablit. Milanog ang tulo ka masipang buto nga migilis sa kalinaw sa kaadlawon. Apan naangkon sab ni Elik ang hingpit nga kalinaw sa iyang hunahuna ug tibuok galamhan dihang gibiyaan siya nga wa nay kinabuhi ni Gino nga kauban niyang ‘pusher’ ug sa kuyog niini. (KATAPUSAN)