NAILHAN lang sa bansagon nga ‘Dumpit’ patay human kini gipusil sa dan Tabada, Barangay Mambaling, dakbayan sa Sugbo kagahapon sa kaadlawon.
Apan ang Dumpit nga napusilan, di mao ang kontrobersiyal nga pulis ug usa kini ka trisikad driver.
Base sa pasiunang imbestigasyon sa kapulisan ug base sa mga testigo sa panghitabo nga nakadungog sila og pagbuto ug dali silang nitago.
Dihang nigawas sila aron magsusi nakit-an nila ang usa ka lalake nga naghigda patay human nakaangkon og samad pinusilan kinsa naila nga si Dumpit.
Sa pakisusi sa Superbalita Cebu sa Mambaling Police Station anaa magpuyo si Dumpit sa Sitio Isla Alegre, Barangay Basak San Nicolas.
Nakaangkon ang biktima og samad sa ulo niini hinungdan sa kamatayon niya.
Bag-o ang insidente, nakadawat ang biktima og death threat gikan sa usa ka tawo nga naila nga si “Jong-Jong” kabahin sa gubot sa pamilya.
Matod ni SPO2 Joseph Toring nga di si SPO2 Adonis Dumpit ang napusilan kinsa nadestino usab sa samang estasyon niadtong Disyembre una kini nabalhin isip Tourist Police.
Padayon pa karong gisusi ang motibo sa pagpusil patay samtang gisusi pa karon sa kapulisan ang tinud-anay nga kailhanan usab sa biktima.