NIBAHAD si Mayor Tomas Osmeña nga tangtangan sa ilang allowance ang mga barangay garbage collectors kon di sila makabuhat sa ilang trabaho.

Sa Facebook page sa mayor nga Tommy Osmeña, iyang gibutyag nga gawas sa honorarium nga madawat sa garbage collector gikan sa barangay, ang siyudad naghatag usab og P5,000 matag buwan.

Partikular sa gibaharan ni Osmeña mao ang mga garbage collector sa Barangay Kamputhaw human makita sa mayor ang naglaundok nga basura sa usa ka tindahan dapit sa Gorordo Avenue.

“If the collectors of Kamputhaw still don’t want to do their jobs and the brgy. hall won’t cooperate. I am going to cancel their allowances and use the money saved to let the City handle collection directly,” tipik sa post ni Osmeña.

Sa pagkakaron, ang City Government way landfill nga kalabayan sa basura ug nikuha sila sa serbisyo sa private provider aron mohakot sa basura sa transfer station paingon sa landfill gawas sa dakbayan.