GIPAHAMTANGAN og unom ka buwan nga suspension sa Office of the Visayas Ombudsman ang regional director sa Overseas Workers Welfare Administration (OWWA) 7 sa Central Visayas nga si Wilfreda Misterio human nakaplagan nga sad-an sa kasong simple misconduct.

Ang kalihim sa Department of Labor and Employment gimandoan sa anti-graft office sa pagpatuman sa suspension.

Sa kamandoan nga giaprobahan ni Deputy Ombudsman for the Visayas Paul Elmer Clemente nga gipakanaog niadtong Disyembre 29, 2016, kini niingon nga kon wa na sa serbisyo ang regional director, pabayron kini og multa tukma sa sweldo nga iyang madawat sud sa unom ka buwan.

Kini gumikan sa kasong administratiba nga grave misconduct/grave abuse of authority nga gipasaka nila ni Romyl Cabillo, Rondell Nolido ug Edeliza Albo, mga trabahante sa Owwa 7 batok sa opisyal niadtong Disyembre 1, 2015.

Sila si Cabillo ug Nolido nipasangil ni Misterio nga niabuso sa iyang gahom pinaagi sa paghatag og ‘0’ rating sa ilang Individual Performance Commitment and Review (IPCR) sud sa duha ka semesters niadtong 2014.

Samtang, si Albo, kanhi janitress sa Owwa 7, nipasangil ni Misterio maoy nag-awhag sa janitorial agency diin siya nangalagad, nga hulipan siya pagka janitress sa Owwa 7 dihang nagdumili siya pagluwat og affidavit pabor niini.

Matod nila ni Cabillo ug Nolido nga ang zero-rating nga gihatag ni Misterio nila usa ka pagpang-harass human sila nipasaka og naunang kaso batok niini niadtong 2015 gumikan sa giingong mga iregularidad nga nahimo niini.

Sa wa pa maduso ang IPCR ni Cabillo sa buhatan ni Misterio, si Owwa Programs and Services Division Chief Mae Codilla nihatag og 3.54 rating niini sa matag duha ka semesters.

Si Nolido nakadawat usab og 2.46 final rating sa unang semester sa 2014 ug 2.38 sa ikaduhang semester sa 2014 gikan ni Owwa Supervising Administrative Officer Reynaldo Jacalan.

Apan pag-abot kang Misterio, gihimo og ‘0’ ang ratings nila ni Nolido ug Cabillo uban sa remarks nga kuwang sila og interes sa ilang trabaho, kinahanglan pirme sultian sa ilang mga gimbuhaton ug di moapil sa group work.

Sa iyang counter-affidavit, si Misterio nipasabot nga isip pangu sa Owwa duna siyay gahom mohimo og imbestigasyon kang Nolido tungod sa paglapas sa mga lagda ug patakaran sa ilang buhatan ug gibase niya ang rating sa actual performance ug evaluation niini.

Apan sa imbestigasyon ni Graft Investigation and Prosecution Officer II Rheia Tibon, kini nakakaplag nga di makiangayon ang “zero-ratings, despite complainants’ high ratings in their respective IPCRs which respondent even approved, respondent displayed unlawful behavior, constituting the element of Simple Misconduct.”