ANG Mantigue Island maoy usa sa tsada nga tourist spot sa probinsya sa Camiguin diin usa sab kini ka marine sanctuary ug perpekto alang sa snorkeling.
Kung gikan ka sa dakbayan sa Cagayan de Oro mahimo lang mosakay og bus sa kantidad nga P120 ug paghidangat sa Balingoan mosakay na usab og lantsa sa kantidad nga P180.00 lakip na ang terminal fee.
Tip nako sa mga mosuroy nga mas maayong grupo moadto aron less ang balayrunon sa pagsuroy.
Pag-abot sa Binoni port sa Camiguin masakay lang kini og motorela sa pamasahe nga P7 ngadto P10 pesos ug paghidangat sa Barangay San Roque mahimo na nga magparehistro aron makasakay og pumpboat nga maoy modala didto sa Mantigue Island sa kantidad nga P550 sa unom ka pasahero.
Alang kanako ang Mantigue usa sa labing tsada nga isla nga akong naadtoan, kini tungod kay limpyo ug labihan ka protektado ang lugar.
Adunay mga nipa cottages nga plastar kaayong miatubang sa nindot nga talan-awon sa isla sama sa bukid sa Camiguin, limpyo nga dagat, puti nga balas ug mabati ang huyuhoy sa hangin.
Tin-aw ug limpyo kaayo ang tubig. Tungod kay naeksperyensa nako nga magsalom sa ilang marine sanctuary didto nako na-appreciate ang katsada sa ilawom sa tubig tungod kay gipalibotan ka og mga dagkong mga isda nga halos imo lang makab-ot.
Kinahanglan usab sa dili pa mag-alas 4 sa hapon nakabalik naka tungod kay gidili ang pag-overnight sa isla.
Sa kinatibuk-an two thumbs up alang sa Mantigue Island ug gusto pako nga mobalik! Kung mobisita mo sa Camiguin hangyo lang ayaw walaa sa inyong listahan tungod kay mas malingaw mo denhi labina kung mokaon og kinamot sulod sa ilang cottage.