GIUGNOK sa San Antonio Spurs ang Cleveland Cavaliers agi sa 118-115 nga daug sa overtime atol sa 2016-17 NBA regular season niadtong Dominggo, Enero 22, didto sa Quicken Loans Arena, home sa Cavs.

Nibira og 41 puntos, unom ka rebounds ug lima ka assists si Kawhi Leonard, samtang niabag sila LaMarcus Aldridge ug David Lee og double-double.

Si Aldridge nitala og 16 puntos ug 12 ka rebounds, samtang si Lee nikulit og 14 puntos ug 11 ka rebounds.

Nakakuha og buylo ang Spurs human malumos ni Patty Mills ang iyang tres aron maangkon ang usa ka punto nga labaw sa iskor 114-113 sa extension.

Segundaan pa nila Aldridge ug Leonard aron mahawiran ang komportable nga labaw paingon sa kadaogan.

Nisulay si Kevin Love pagtabla sa dula sa minus segundo nabilin apan kulang sa porma ang iyang itsa sa tres.

Nangulo si Kyrie Irving sa Cavs nga adunay 26 puntos, siyam ka assists ug tulo ka rebounds, samtang nihatag sab si Lebron James og 26 puntos, pito ka assists ug unom ka rebounds.

Naa lang gihapon ang Spurs sa ikaduha nga pwesto sa western conference nga adunay 34-9 win-loss record, samtang nag-una lang gihapon ang Cavs sa east bisan sa plde nga adunay 30-12.