WALAY puas ang pagpanghatod og hinabang sa City Social Welfare and Development (CSWD) ngadto sa mga nabiktima sa baha niadtong niaging semana.
Basi sa ilang talaan adunay 30 ka mga barangay sa dakbayan sa Cagayan de Oro ang apektado apan niadtong adlaw’ng Biyernes, Enero 20, siyam niini ang wala pa nahatoran og ayuda diin lakip ang Barangay Camaman-an.
Tulo ka mga panimalay ang totally washed out sa maong barangay diin sa kinatibuk-an dul-an 200 ang mga nagubang panimalay gumikan sa pagbaha dinhi sa dakbayan diin dul-an upat ka libo ka mga indibidwal ang apektado.
Gipahibalo sab sa CSWD nga sila mismo ang moadto sa barangay aron moapod og hinabang ug nakaskedyul kini.
Kahinumduman nga niaging semana niadtong adlaw’ng Lunes nasinati sa dakbayan ang halapad nga pagbaha gumikan sa nasinating low pressure ug tail end of the cold front.
Gawas sa mga nabahaan niadtong tungora ubay-ubay sab sa mga tinun-an ang stranded sa sa ilang nagkadaiyang tunghaan labina gayud ang Mindanao University of Science and Technology. (SVB)